ലഖ്‌നൗ: 15മത് ഫെഡറേഷന്‍ കപ്പ് ദേശീയ ജൂനിയര്‍ അത്‌ലറ്റിക്‌സ് ചാംപ്യന്‍ഷിപ്പിന്റെ ആദ്യ ദിനത്തില്‍ കേരളത്തിന് നിരാശ. ആദ്യ ദിനത്തില്‍ ഒറ്റ മെഡല്‍ പോലും നേടാനാകാതെ കേരള താരങ്ങള്‍ പിന്നിലായി.
ഇന്നലെ രാവിലെ നടന്ന പെണ്‍കുട്ടികളുടെ 3000 മീറ്ററില്‍ മത്സരിച്ച കേരളത്തിന്റെ ജിസ്‌മോള്‍ 12ഉം അഞ്ജു റോസ് 13ഉം സുകന്യ എല്‍ 14ഉം സ്ഥാനത്താണ് ഫിനിഷ് ചെയ്തത്. പെണ്‍കുട്ടികളുടെ ലോങ് ജംപില്‍ കേരളത്തിന്റെ ലിസ്ബത്ത് കരോലിന്‍ ജോസഫ് എട്ടാം സ്ഥാനത്തും മറ്റൊരു താരം ഗീതു ദാസ് 10ാം സ്ഥാനത്തുമാണ് എത്തിയത്. പെണ്‍കുട്ടികളുടെയും ആണ്‍കുട്ടികളുടെയും 100 മീറ്ററില്‍ കേരളത്തിന്റെ എന്‍.എസ് നിത്യ ഏഴാം സ്ഥാനത്തും അതുല്‍ സേനന്‍ ആറാമതുമാണ് മത്സരം പൂര്‍ത്തിയാക്കിയത്. തെലങ്കാനയുടെ ജി നിത്യ പെണ്‍കുട്ടികളിലേയും ഹരിയാനയുടെ നുസ്‌റത്ത് ആണ്‍കുട്ടികളിലേയും വേഗമേറിയ താരങ്ങളായി. പുരുഷന്‍മാരുടെ 400 മീറ്ററില്‍ മത്സരിച്ച കേരളത്തിന്റെ അരുണ്‍ വി നാലാം സ്ഥാനത്തെത്തി. 1500 മീറ്റര്‍ പുരുഷ, വനിതാ വിഭാഗങ്ങളില്‍ മത്സരിച്ച കേരളത്തിന്റെ അഭിനന്ദ് സുന്ദരേശന്‍ ആറാം സ്ഥാനത്തും അനഘ ടോം ഒന്‍പതാമതുമാണ് എത്തിയത്.
ചാംപ്യന്‍ഷിപ്പിന്റെ രണ്ടാം ദിനമായ ഇന്ന് 13 ഇനങ്ങളിലാണ് ഫൈനല്‍ അരങ്ങേറുന്നത്. മൂന്ന് ദിവസങ്ങളിലായി നടക്കുന്ന പോരാട്ടങ്ങള്‍ നാളെ സമാപിക്കും.