തിരുവനന്തപുരം: മില്‍മ പാലിന് ലിറ്ററിന് നാലുരൂപവരെ വര്‍ധിപ്പിക്കാന്‍ തീരുമാനം. സെപ്റ്റംബര്‍ 21മുതല്‍ പുതുക്കിയ വില പ്രാബല്യത്തില്‍ വരുമെന്ന് മന്ത്രി കെ.രാജുവിന്റെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനമായി.

എല്ലാ ഇനം പാലുകള്‍ക്കും വിലകൂടും. ക്ഷീര കര്‍ഷകരുടെ പ്രതിസന്ധി ചൂണ്ടിക്കാണിച്ചാണ് തീരുമാനം. ഏഴു രൂപ കൂട്ടണമെന്നായിരുന്നു മില്‍മയുടെ ആവശ്യം. എന്നാല്‍ നാലു രൂപ വര്‍ധിപ്പിച്ചാല്‍ മതിയെന്ന് യോഗം തീരുമാനിക്കുകയായിരുന്നു. കൂടുന്ന വിലയുടെ 83.75 ശതമാനം കര്‍ഷകര്‍ക്ക് ലഭിക്കും. മൂന്ന് രൂപ 35പൈസ കര്‍ഷകര്‍ക്ക് കൂടുതലായി ലഭിക്കും.

2017ലാണ് മില്‍മ അവസാനമായി വിലകൂട്ടിയത്. സര്‍ക്കാര്‍ ഫാമുകളില്‍ ഇതിനോടകം തന്നെ പാല്‍വില കൂടിയിട്ടുണ്ട്.