തിരുവനന്തപുരം: ഡല്‍ഹിയിലെ സിജെപി സമരത്തില്‍ തന്റെ മുന്‍ നിലപാടില്‍ നിന്ന് മലക്കം മറിഞ്ഞ് നടന്‍ മാധവ് സുരേഷ്. ഡല്‍ഹിയില്‍ നടന്ന പ്രതിഷേധങ്ങളില്‍ പങ്കെടുത്തവര്‍ കേരളത്തിലെയും പഞ്ചാബിലെയും പ്രശ്‌നങ്ങള്‍ക്ക് നേരെ കണ്ണടയ്ക്കുകയാണെന്ന് മാധവ് പറഞ്ഞു. ബിജെപി ഭരിക്കുന്നിടങ്ങളില്‍ മാത്രം വിദ്യാഭ്യാസ പ്രശ്‌നങ്ങള്‍ കണ്ടുപിടിക്കുന്നവരുടെ ഇരട്ടത്താപ്പാണ് ഇതെന്നും താരം പറഞ്ഞു. 

നേരത്തെ ഡല്‍ഹി സമരം ശക്തിയാര്‍ജിച്ച സമയത്ത് മാധവ് പ്രതിഷേധങ്ങളെ അനുകൂലിച്ച് രംഗത്തെത്തിയിരുന്നു. ഭരണകൂടവും, പ്രതിപക്ഷവും തമ്മിലുള്ള പോരാട്ടത്തില്‍ ഒടുവില്‍ തോറ്റുപോകുന്നത് ഇന്ത്യയിലെ സാധാരണക്കാരാണെന്നും, ഇതിനൊരു ശാശ്വത പരിഹാരം ഉണ്ടാകണമെന്നുമായിരുന്നു മാധവ് സുരേഷ് അന്ന് പറഞ്ഞത്. കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ രാജിവെച്ചപ്പോള്‍ വിദ്യാര്‍ഥികള്‍ക്കെതിരെ അതിക്രമം നടത്തിയ പൊലിസ് ഉദ്യോഗസ്ഥര്‍ക്കെതിരെ നടപടിയെടുക്കണമെന്നും മാധവ് ആവശ്യപ്പെട്ടിരുന്നു. ഈ നിലപാടില്‍ നിന്ന് നേര്‍ വിപരീതമാണ് ഇപ്പോള്‍ പോസ്റ്റ് ചെയ്ത ഇന്‍സ്റ്റഗ്രാം സ്‌റ്റോറിയിലുള്ളത്. 

ബിജെപി ഭരിക്കുന്നിടങ്ങളില്‍ മാത്രം വിദ്യാഭ്യാസ പ്രശ്‌നങ്ങള്‍ കണ്ടുപിടിക്കുന്നവരുടെ ഇരട്ടത്താപ്പ് പുറത്തായെന്നും, പഞ്ചാബില്‍ എഎപി ഭരണത്തിലുള്ളപ്പോള്‍ ഇത്തരം പുരോഗമനവാദികളുടെ നട്ടെല്ല് വാഴപ്പിണ്ടിയാകുകയാണെന്നും മാധവ് പരിഹസിച്ചു. നീറ്റ് പരീക്ഷാര്‍ഥികള്‍ക്ക് വേണ്ടി വാദിച്ചവര്‍ പഞ്ചാബിലെ വിദ്യാര്‍ഥികള്‍ക്ക് വേണ്ടിയും വാദിക്കണം. അഭിജിത് ദീപ്‌കേ അടക്കമുള്ളവരോട് വിഷയത്തില്‍ മറുപടി പറയാന്‍ മാധവ് വെല്ലുവിളിക്കുകയും ചെയ്തിട്ടുണ്ട്. 

' സിജെപി തട്ടിപ്പുകാരുടെ കൂട്ടമാണ്. അവര്‍ ഉടന്‍ തന്നെ തുറന്നുകാട്ടപ്പെടും. അന്ധമായി വിശ്വസിക്കുന്നവരെ നിങ്ങളുടെ വിശ്വാസം കൈവിടാതെ പിടിച്ചോളൂ. അവര്‍ യഥാര്‍ഥത്തില്‍ തുറന്ന് കാട്ടപ്പെടുമ്പോള്‍ നിങ്ങള്‍ അഭിപ്രായം മാറ്റുമെന്ന് ഞാന്‍ പ്രതീക്ഷിക്കുന്നു. എല്ലാവരും എന്താണ് മിണ്ടാതിരിക്കുന്നത്? ബിജെപി സര്‍ക്കാര്‍ ശരിയായ തീരുമാനമാണ് എടുത്തത്. അത് ചിലര്‍ക്ക് ദഹിക്കില്ലെന്ന് ഉറപ്പാണ്. മാധവ് പോസ്റ്റില്‍ കുറിച്ചു.