ദുബൈ: വഴിയിൽ മറന്നുവെക്കുകയോ നഷ്ടപ്പെടുകയോ ചെയ്യുന്ന വസ്തുക്കൾ വീണ്ടെടുത്താൽ ഉടമസ്ഥർക്ക് നേരിട്ടെത്തിച്ചു നൽകുന്ന പുതിയ പദ്ധതിക്ക് തുടക്കമിട്ട് ദുബൈ പൊലിസ്. അധികൃതർ കണ്ടെത്തുന്ന ഇത്തരം സാധനങ്ങൾ അംഗീകൃത കൊറിയർ സർവീസ് വഴി താമസക്കാരുടെ വീട്ടിലോ ജോലിസ്ഥലത്തോ എത്തിച്ചു നൽകും. യുഎഇയിൽ എവിടെയുള്ളവർക്കും ഈ സേവനം പ്രയോജനപ്പെടുത്താം.

സോഷ്യൽ മീഡിയ ചാനലുകൾ വഴിയാണ് ദുബൈ പൊലിസ് ഈ പ്രഖ്യാപനം നടത്തിയത്. മുൻപ് നഷ്ടപ്പെട്ട വസ്തുക്കൾ കൈപ്പറ്റാൻ പൊലിസ് സ്റ്റേഷനുകളിലോ സേവന കേന്ദ്രങ്ങളിലോ നേരിട്ടെത്തണമായിരുന്നു. എന്നാൽ പുതിയ സംവിധാനത്തോടെ ഈ ബുദ്ധിമുട്ട് ഒഴിവാകും. പൊതുജനങ്ങൾക്ക് നൽകുന്ന സേവനങ്ങളുടെ നിലവാരം മെച്ചപ്പെടുത്തുന്നതിന്റെയും ജനക്ഷേമം ഉറപ്പാക്കുന്നതിന്റെയും ഭാഗമായാണ് നടപടി.

"നിങ്ങളുടെ നഷ്ടപ്പെട്ട വസ്തുക്കൾ, നിങ്ങൾ യുഎഇയിൽ എവിടെയാണെങ്കിലും നേരിട്ട് നിങ്ങളിലേക്ക് എത്തിച്ചു തരും" ദുബൈ പൊലിസ് വ്യക്തമാക്കി.

പൊതുജനങ്ങൾക്ക് നൽകുന്ന സ്മാർട്ട് സേവനങ്ങൾ കൂടുതൽ കാര്യക്ഷമമാക്കുന്നതിന്റെ ഭാഗമായാണ് ഈ വിപുലീകരണം. കണ്ടെത്തിയ വസ്തുക്കൾ വീടുകളിലെത്തിക്കാൻ ആഗ്രഹിക്കുന്നവർക്ക് 901 എന്ന നമ്പറിൽ ദുബൈ പൊലിസ് കോൾ സെന്ററുമായി ബന്ധപ്പെട്ട് ആവശ്യമായ നടപടികൾ പൂർത്തിയാക്കാം.

ALSO READ: യുഎഇയിൽ ഗാർഹിക തൊഴിലാളി ഏജൻസികൾക്കെതിരെ കർശന നടപടി; ആറ് മാസത്തിനിടെ 42 സ്ഥാപനങ്ങൾക്ക് പിഴ ചുമത്തി 

Dubai Police has introduced a home delivery service for lost and found items, making it easier for residents to recover belongings quickly while enhancing convenience and public service efficiency.