മണ്ണാര്‍ക്കാട്: ആദിവാസികളായ കോളനി നിവാസികളോട് അപമര്യാദയായി പെരുമാറിയിട്ടില്ലെന്നും,തന്നെ ഏല്‍പ്പിച്ച ഉത്തരവാദിത്വം നിറവേറ്റുക മാത്രമാണ് താന്‍ ചെയ്തതെന്നും, എം.എല്‍.എക്കെതിരെയുള്ള കേസില്‍ ഉറച്ച് നില്‍ക്കാനാണ് തീരുമാനമെന്നും മണ്ണാര്‍ക്കാട് ഫോറസ്റ്റ് സെക്ഷന്‍ ഒഫീസര്‍ ആര്‍.സജീവന്‍. കൃഷി വെട്ടി നശിപ്പിച്ചതുമായി ബന്ധപ്പെട്ട് കോളനി നിവാസികള്‍ വനം വകുപ്പ് മന്ത്രിക്കും, ഡി.എഫ്.ഒ ക്കും നല്‍കിയ പരാതിയെ കുറിച്ച് പ്രതികരിക്കുകയായിരുന്നു അദ്ദേഹം.
ബലമായി ഒഴിപ്പിച്ചു എന്ന് അവര്‍ പറയുന്ന ഭൂമി 1977 നു ശേഷം കയ്യേറ്റക്കാരെ ഒഴിപ്പിച്ച പ്രദേശം ആണെന്നും,പരാതിയുമായി രംഗത്തുള്ളവര്‍ വീണ്ടും ആഹ് സ്ഥലം കയ്യേറി അവകാശം സ്ഥാപിച്ചതാണെന്നും എഫ്.എസ്.ഒ പറഞ്ഞു.കയ്യേറ്റക്കാര്‍ക്ക് പിന്തുണയുമായി വന്ന ചില തല്പര കക്ഷികള്‍ ലക്ഷ്യം വെക്കുന്നത് വോട്ട് ബാങ്ക് ആണെന്നും രാഷ്ട്രീയക്കാര്‍ മുതലെടുപ്പിന് ശ്രമിക്കുകയാണെന്നും അദ്ദേഹം ചൂണ്ടിക്കാട്ടി. എഫ്.എസ്.ഒ ക്കെതിരെ ആരോപണവുമായി കോളനി നിവാസികള്‍ അടങ്ങുന്ന സര്‍വ്വ കക്ഷി സംഘം വ്യാഴാഴ്ച രംഗത്തെത്തിയിരുന്നു.ആരോപണ വിധേയനായ ഉദ്യോഗസ്ഥന്റെ നേതൃത്വത്തില്‍ പൂഞ്ചോല പാമ്പന്‍തോട് പ്രദേശത്തു താമസിക്കുന്നവരുടെ കാര്‍ഷിക വിളകള്‍ വെട്ടി നശിപ്പിച്ചെന്നും,പ്രകോപനപരമായി പെരുമാറിയെന്നും കാണിച്ച് പ്രദേശ വാസികള്‍ പരാതിയുമായി വനം വകുപ്പ് മേധാവികളെ സമീപിച്ചിരുന്നു.
ഇതിനെ തുടര്‍ന്ന് സര്‍വ്വേ നടത്തി നഷ്ടപരിഹാരം നല്‍കാമെന്ന് ഡി.എഫ്.ഒ വി.പി.ജയപ്രകാശ് അംഗീകരിച്ചിരുന്നതായും കോളനി നിവാസികള്‍ പറഞ്ഞിരുന്നു. എന്നാല്‍ താന്‍ കൃത്യ നിര്‍വഹണം നിര്‍വഹിച്ചതില്‍ പിഴവ് സംഭവിച്ചിട്ടില്ലെന്ന വാദത്തില്‍ ഉറച്ചു നില്‍ക്കുകയാണ് ഉദ്യോഗസ്ഥന്‍.വനം വകുപ്പ് മേലധികാരി പരാതിക്കാര്‍ക്കു നല്‍കിയ ഉറപ്പിനെ കുറിച്ച് തനിക്കു അറിവില്ലെന്നും,മേധാവികളുടെ നിര്‍ദ്ദേശ പ്രകാരമാണ് താന്‍ എം.എല്‍.എ ക്കെതിരെ നിയമ നടപടിക്ക് ഒരുങ്ങിയതെന്നും അദ്ദേഹം അഭിപ്രായപ്പെട്ടു.
പരാതിക്കാര്‍ ഉയര്‍ത്തിക്കൊണ്ടുവന്ന രേഖകള്‍ വ്യാജമാണെന്നും ഇദ്ദേഹം പറയുന്നു.ഇതു പരിശോധനക്ക് വിധേയമാക്കണമെന്നും ഇദ്ദേഹം ആവശ്യപ്പെട്ടു.കോളനിക്കാര്‍ ഉന്നയിക്കുന്ന ആരോപണങ്ങളില്‍ വ്യക്തതയില്ലെന്നും പൊരുത്തക്കേടുകള്‍ ഉള്ളതായി മനസ്സിലാക്കാന്‍ കഴിഞ്ഞതായും അദ്ദേഹം പറഞ്ഞു.
എന്നാല്‍ താന്‍ നല്‍കിയ പരാതി എം.എല്‍.എ. കെ.വി.വിജയദാസ് നിഷേധിച്ചതുമായി ബന്ധപ്പെട്ട ചോദ്യത്തിന് പരാതിയില്‍ ഉറച്ച് നില്‍ക്കുന്നതായും,എം.എല്‍.എ ക്കെതിരെയുള്ള കേസുമായി മുന്നോട്ടു പോവുമെന്നും,യാതൊരു വിധത്തിലുമുള്ള സമ്മര്‍ദ്ദങ്ങള്‍ക്കും താന്‍ വഴങ്ങില്ലെന്നും എഫ്.എസ്.ഒ ആര്‍.സജീവന്‍ പറഞ്ഞു.