കോഴിക്കോട്: സംസ്ഥാന സര്‍ക്കാരിന്റെ പുതിയ മദ്യനയത്തെ തുടര്‍ന്ന് ജില്ലയില്‍ ബാര്‍ ലൈസന്‍സ് ലഭിക്കുക നാലു ഹോട്ടലുകള്‍ക്ക് മാത്രം. നിലവില്‍ ബാര്‍ ലൈസന്‍സുള്ള പഞ്ചനക്ഷത്ര ഹോട്ടലായ താജ് വിവാന്തയ്ക്കു പുറമേ ഹോട്ടല്‍ മഹാറാണി, ബീച്ച് ഹെറിറ്റേജ്, ഗോവിന്ദപുരത്തെ കോവിലകം റസിഡന്‍സി, മുക്കം കുന്ദമംഗലം റോഡിലുള്ള ഹോട്ടല്‍ ഹില്‍സൈഡ് എന്നീ ഹോട്ടലുകള്‍ക്കാണ് ബാര്‍ ലൈസന്‍സ് ലഭിക്കുക. ഇതില്‍ മൂന്നെണ്ണം ത്രീസ്റ്റാര്‍ പദവി നേടിയതും ഒന്ന് ഫോര്‍സ്റ്റാര്‍ പദവിയുള്ളതുമാണ്.
ജില്ലയില്‍ 35 വൈന്‍ ആന്‍ഡ് ബിയര്‍ പാര്‍ലറുകളാണുള്ളത്. ഇതില്‍ നല്ലൊരു ഭാഗവും കോടതിയില്‍നിന്ന് ബിയര്‍ ആന്‍ഡ് വൈന്‍ പാര്‍ലര്‍ വില്‍വപ്പനാനുമതി നേടിയവയാണ്. ദേശീയപാതയില്‍നിന്ന് 500 കിലോമീറ്റര്‍ അകലെയായിരിക്കണം എന്ന സുപ്രിംകോടതി വിധിയെ തുടര്‍ന്ന് പൂട്ടിയവയായിരുന്നു ഇവ. ദേശീയപാതക്കരികില്‍ അല്ലെന്ന് കാണിച്ചാണ് ബിയര്‍ ആന്‍ഡ് വൈന്‍ പാര്‍ലര്‍ നടത്തുന്നതിനുള്ള വിധി നേടിയെടുത്തത്. എന്നാല്‍, ത്രീസ്റ്റാര്‍ പദവി ലഭിച്ചതാണെങ്കിലും ഇവര്‍ക്ക് ബാര്‍ ലൈസന്‍സ് കിട്ടണമെങ്കില്‍ വീണ്ടും കോടതിയെ സമീപിച്ച് അനുകൂല വിധി നേടിയെടുക്കേണ്ടി വരും. ബാക്കിയുള്ളവ ത്രീസ്റ്റാര്‍ ലൈസന്‍സ് പോലും നേടിയെടുക്കാത്തവയാണ്.
ജില്ലയില്‍ കള്ളുഷാപ്പുകളുടെ എണ്ണം 208 ആണ്. ഇതില്‍ നടപ്പുവര്‍ഷം 197 എണ്ണം പുതുക്കി നല്‍കി. അതില്‍ ലൈസന്‍സ് ലഭിച്ചിട്ടുള്ളത് 193 എണ്ണത്തിനാണ്. എന്നാല്‍ അവയില്‍ പ്രവര്‍ത്തിക്കുന്നത് 185 എണ്ണമേ ഉള്ളൂ. ജില്ലയില്‍ 14 ബിവറേജസ്, കണ്‍സ്യൂമര്‍ മദ്യവില്‍പ്പന ശാലകളാണ് പ്രവര്‍ത്തിക്കുന്നത്.