പാരീസ്ബല്‍ഗ്രേഡ്: 2020ലെ യൂറോകപ്പിലേക്കുള്ള യോഗ്യതാ റൗണ്ടിലെ മത്സരങ്ങളില്‍ നിലവിലെ ലോകകപ്പ് ചാംപ്യന്‍മാരായ ഫ്രാന്‍സിനും യൂറോകപ്പ് ചാംപ്യന്‍മാരായ പോര്‍ച്ചുഗലിനും തകര്‍പ്പന്‍ ജയം. ഗ്രൂപ്പ് എച്ചില്‍ ഫ്രാന്‍സ് അല്‍ബേനിയയെ 4-1നും ഗ്രൂപ്പ് ബിയില്‍ പോര്‍ച്ചുഗല്‍ സെര്‍ബിയയെ 4-2നുമാണ് തോല്‍പ്പിച്ചത്. ഫ്രാന്‍സിനായി കിങ്‌സ് ലി കോമാന്‍ (8,68) ഇരട്ടഗോളുകള്‍ നേടി. 27ാം മിനുട്ടില്‍ ജിറൗഡും 85ാം മിനുട്ടില്‍ ജൊനാഥന്‍ ഇക്കോണെയുമാണ് ഫ്രാന്‍സിന്റെ മറ്റു ഗോളുകള്‍ നേടിയത്. 90ാം മിനുട്ടില്‍ സൊകോള്‍ സിക്കലേഷിയാണ് പെനാല്‍റ്റിയിലൂടെ അല്‍ബേനിയയുടെ ആശ്വാസഗോള്‍ നേടിയത്. അഞ്ച് കളികളില്‍നിന്ന് നാല് ജയമടക്കം 12 പോയിന്റുള്ള ഫ്രാന്‍സ് ഗ്രൂപ്പ് എച്ചില്‍ ഒന്നാമതാണ്.
പോര്‍ച്ചുഗല്‍ ജയിച്ച മത്സരത്തില്‍ 42ാം മിനുട്ടില്‍ വില്ല്യം കര്‍വാലോയാണ് ടീമിനെ മുന്നിലെത്തിച്ചത്. ഗോണ്‍സാലോ ഗ്യീഡസ് (58), ക്രിസ്റ്റ്യാനോ റൊണാള്‍ഡോ (80), ബെര്‍ണാഡോ സില്‍വ (86) എന്നിവരാണ് മറ്റു ഗോള്‍ സ്‌കോറര്‍മാര്‍. സെര്‍ബിയക്കുവേണ്ടി മിലെന്‍കോവിച്ചും (68) മിട്രോവിച്ചും (85) ഗോള്‍ നേടി. മൂന്ന് കളികളില്‍നിന്ന് അഞ്ച് പോയിന്റാണ് പോര്‍ച്ചുഗലിനുള്ളത്. ഒന്നാം സ്ഥാനത്തുള്ള ഉക്രൈനിന് അഞ്ച് കളികളില്‍ നിന്ന് പതിമൂന്ന് പോയിന്റുണ്ട്. ലിത്വാനിയയെ മടക്കമില്ലാത്ത മൂന്ന് ഗോളിന് തകര്‍ത്താണ് ഉക്രൈന്‍ ലീഡുറപ്പിച്ചത്.
മറ്റുമത്സരങ്ങളില്‍ കൊസോവോ ചെക്ക് റിപ്പബ്ലിക്കിനെ 2-1നും ഐസ്‌ലന്‍ഡ് മോള്‍ഡോവയെ 3-0നും തുര്‍ക്കി അന്‍ഡോറയെ 1-0നും തോല്‍പ്പിച്ചു.