വടകര: തിരുവള്ളൂര്‍, തോടന്നൂര്‍ പ്രദേശങ്ങളിലെ രണ്ട് മുസ്‌ലിം ലീഗ് ഓഫിസുകള്‍ അക്രമിച്ച കേസില്‍ പത്ത് സി.പി.എം പ്രവര്‍ത്തകര്‍ അറസ്റ്റിലായി. തോടന്നൂര്‍ സ്വദേശികളായ വരക്കൂല്‍ അരുണ്‍ (26), മൊട്ടംതറമ്മല്‍ ജിഷ്ണു (24), പള്ളിക്കുന്നത്ത് ബബിന്‍ (23), വലിയപറമ്പത്ത് സിജു (19), ബാബുപ്പാറ മെമ്മേനിമീത്തല്‍ അര്‍ജുന്‍ (24), തയ്യില്‍ ഷിബിന്‍(27), നടുക്കണ്ടി ശ്രീജേഷ് (27), ഡല്‍ജിത്ത് കാര്യപറമ്പത്ത് (27), തിരുവള്ളൂര്‍ പുത്തന്‍പുരയില്‍ ജിതിന്‍ (24), പനയുള്ളപറമ്പത്ത് ബിജിന്‍ലാല്‍ (27) എന്നിവരെയാണ് വടകര ഡിവൈ.എസ്.പി കെ. സുദര്‍ശനും സംഘവും അറസ്റ്റ് ചെയ്തത്.
മുസ്‌ലിം ലീഗ് കുറ്റ്യാടി മണ്ഡലം കമ്മിറ്റി ഓഫിസ് അക്രമിച്ച കേസില്‍ രണ്ടു പേരും തോടന്നൂരിലെ മുസ്‌ലിം ലീഗ് ഓഫിസ് അക്രമിച്ച കേസില്‍ എട്ടു പേരുമാണ് അറസ്റ്റിലായത്. സി.പി.എം ഓഫിസുകള്‍ അക്രമിച്ച കേസില്‍ 12 ലീഗ് പ്രവര്‍ത്തകരെയും കസ്റ്റഡിയിലെടുത്തിട്ടുണ്ട്. ശനിയാഴ്ച പൊലിസ് നടത്തിയ റെയ്ഡിലാണ് പ്രതികള്‍ അറസ്റ്റിലായത്. വടകര, തിരുവള്ളൂര്‍, തോടന്നൂര്‍ എന്നിവിടങ്ങളിലെ അക്രമസംഭവങ്ങളുമായി ബന്ധപ്പെട്ട് 350ഓളം പേര്‍ക്കെതിരേയാണ് കേസെടുത്തതെന്ന് ഡിവൈ.എസ്.പി പറഞ്ഞു.
ഇരുപത്തിയഞ്ചോളം കേസുകള്‍ രജിസ്റ്റര്‍ ചെയ്തിട്ടുണ്ട്. സി.പി.എം വടകര ഏരിയാ കമ്മിറ്റി ഓഫിസായ കേളുവേട്ടന്‍ മന്ദിരം അക്രമിച്ച സംഭവത്തില്‍ ആറു പേരെയും ആര്‍.എസ്.എസ് കാര്യാലയത്തിനു നേരെ ബോംബെറിഞ്ഞ കേസില്‍ പത്ത് പേരെയും ബി.ജെ.പി സംസ്ഥാന സെക്രട്ടറി വി.കെ സജീവന്റെ വീട് അക്രമിച്ച കേസിലെ പ്രതികളെയും തിരിച്ചറിഞ്ഞതായി പൊലിസ് പറഞ്ഞു.