ഹൈദരാബാദ്: ദുബൈയിൽ നിന്ന് ഹൈദരാബാദിലേക്കുള്ള വിമാനത്തിൽ വെച്ച് വിമാന ജീവനക്കാരിയെ ലൈംഗികമായി പീഡിപ്പിക്കാൻ ശ്രമിക്കുകയും അപമര്യാദയായി പെരുമാറുകയും ചെയ്ത കേസിൽ മലയാളി യാത്രക്കാരൻ അറസ്റ്റിൽ. ഹൈദരാബാദ് രാജീവ് ഗാന്ധി അന്താരാഷ്ട്ര വിമാനത്താവളത്തിൽ വിമാനം ലാൻഡ് ചെയ്തതിന് ശേഷം ഇയാളെ പൊലിസ് കസ്റ്റഡിയിലെടുത്തു.

വിമാനത്തിനുള്ളിൽ വെച്ച് യാത്രക്കാരൻ മദ്യപിച്ചിരുന്നെന്നും, ജോലിക്കിടെ എയർ ഹോസ്റ്റസിനെ അനുചിതമായി സ്പർശിച്ചെന്നും കാബിൻ ക്രൂ നൽകിയ പരാതിയിൽ പറയുന്നു.

വിമാനം ലാൻഡ് ചെയ്തതിന് ശേഷവും യാത്രക്കാരൻ പാസ്‌പോർട്ട് നഷ്ടപ്പെട്ടതായി അവകാശപ്പെട്ടതിനെ തുടർന്ന് ജീവനക്കാർ അന്വേഷണം നടത്തുന്നതിനിടെയാണ് ഇയാൾ ഇരുന്ന സീറ്റിന് സമീപത്തുനിന്ന് അസഭ്യവും അധിക്ഷേപകരവുമായ പരാമർശങ്ങളുള്ള ഒരു കുറിപ്പ് കണ്ടെത്തിയത്. ടൈംസ് നൗ ആണ് ഇത് റിപ്പോർട്ട് ചെയ്തത്.

ALSO READ: പ്രവാസികൾക്ക് സന്തോഷവാർത്തയുമായി എയർ ഇന്ത്യ എക്സ്പ്രസ്: കുവൈത്തിൽ നിന്ന് കോഴിക്കോട്, കണ്ണൂർ സർവിസുകൾ ഉടൻ; ബുക്കിംഗ് ആരംഭിച്ചു 

യാത്രക്കാരനെ വെള്ളിയാഴ്ച അറസ്റ്റ് ചെയ്യുകയും പ്രാദേശിക കോടതിയിൽ ഹാജരാക്കിയ ശേഷം ജുഡീഷ്യൽ റിമാൻഡിൽ വിടുകയും ചെയ്തു. രാജീവ് ഗാന്ധി അന്താരാഷ്ട്ര വിമാനത്താവള പൊലിസ് സ്റ്റേഷൻ ഇൻസ്പെക്ടർ കങ്കയ്യ സമപതി അറസ്റ്റ് വിവരം സ്ഥിരീകരിച്ചു.

യാത്രക്കാരനെതിരെ ഇന്ത്യൻ ശിക്ഷാ നിയമത്തിലെ സെക്ഷൻ 74 (ഒരു സ്ത്രീയുടെ മാന്യതയെ വ്രണപ്പെടുത്താനുള്ള ഉദ്ദേശ്യത്തോടെയുള്ള ആക്രമണം അല്ലെങ്കിൽ ക്രിമിനൽ ബലപ്രയോഗം), സെക്ഷൻ 75 (ലൈംഗിക പീഡനം) എന്നിവ ഉൾപ്പെടെയുള്ള പ്രസക്തമായ വകുപ്പുകൾ പ്രകാരമാണ് കേസെടുത്തിരിക്കുന്നത്. വിമാന യാത്രയ്ക്കിടെ ജീവനക്കാർക്ക് ആഘാതമുണ്ടാക്കുന്ന സംഭവങ്ങൾ വർധിക്കുന്ന സാഹചര്യത്തിൽ, സഹയാത്രികരോടും എയർ ഹോസ്റ്റസുമാരോടും മാന്യമായും പരിഗണനയോടെയും പെരുമാറണമെന്ന് അധികൃതർ യാത്രക്കാരോട് ആവർത്തിച്ച് ആവശ്യപ്പെടുന്നുണ്ട്. 

a malayali passenger was arrested for reportedly harassing an air hostess during a dubai-hyderabad flight, causing a security incident on board.