റിയാദ്: സഊദിയില്‍ ഭരണപരിഷ്‌കാരവുമായി വീണ്ടും സല്‍മാന്‍ രാജാവ്. ഊര്‍ജ, വ്യവസായ മന്ത്രിക്കാണ് സ്ഥാനചലനമുണ്ടായത്. പുതിയ ഊര്‍ജമന്ത്രിയായി തന്റെ മക്കളിലൊരാളായ അബ്ദുല്‍ അസീസ് ബിന്‍ സല്‍മാന്‍ രാജകുമാരനെ നിയമിച്ച് സല്‍മാന്‍ രാജാവ് രാജവിജ്ഞാപനമിറക്കി. 2016 മുതല്‍ ഊര്‍ജമന്ത്രി പദവി വഹിച്ചിരുന്ന ഖാലിദ് അല്‍ ഫാലിഹിനെ മാറ്റിയാണ് പുതിയ നിയമനം.
ഈയാഴ്ച നടക്കുന്ന രണ്ടാമത്തെ ഭരണ പരിഷ്‌കാരമാണിത്. നേരത്തെ സഊദി ദേശീയ എണ്ണക്കമ്പനിയായ സഊദി അരാംകോയുടെ ചെയര്‍മാന്‍ സ്ഥാനത്ത് നിന്നും ഖാലിദ് അല്‍ ഫാലിഹിനെ മാറ്റിയിരുന്നു.മൂന്നു വര്‍ഷത്തിനിടെ ഇത് മൂന്നാം തവണയാണ് സഊദി ഊര്‍ജമന്ത്രിയെ മാറ്റുന്നത്. ഒപെക് - ഒപെക് ഇതര കൂട്ടായ്മ എന്നിവയുടെ സഹകരണത്തില്‍ ഏറ്റവും കൂടുതല്‍ ഇടപടുന്ന രാജ്യമെന്ന നിലക്ക് സഊദി ഊര്‍ജമന്ത്രി സ്ഥാനം ഏവരും ഉറ്റുനോക്കുന്നതാണ്. ഊര്‍ജമന്ത്രിയെ മാറ്റിയതിനു പുറമെ സുല്‍ത്താന്‍ അഹമ്മദ് ബിന്‍ അബ്ദുല്‍ അസീസ് ആലു സഊദിനെ ബഹ്‌റൈന്‍ അംബാസിഡറായും നിയമിച്ചു. ഉസാമ ബിന്‍ അബ്ദുല്‍ അസീസ് അല്‍ സാമിലിനെ വ്യവസായ പ്രകൃതി വിഭവ വകുപ്പിന്റെ സഹമന്ത്രിയായും നിയമിച്ചിട്ടുണ്ട്. നിലവിലെ അവസ്ഥയില്‍ സഊദി ഊര്‍ജ, വ്യവസായ രംഗത്തെ കൂടുതല്‍ പരിപോഷിപ്പിക്കുന്നതിനായി ഊര്‍ജമന്ത്രാലയത്തെ വ്യവസായ മന്ത്രാലയത്തില്‍ നിന്നു വേര്‍പെടുത്തിയിട്ടുണ്ട്.
ഊര്‍ജമന്ത്രാലയത്തെ സഊദി അരാംകോയില്‍ നിന്ന് വേര്‍പ്പെടുത്താന്‍ ലക്ഷ്യമിട്ടാണ് സഊദി അരാംകോ ഡയറക്ടര്‍ ബോര്‍ഡ് ചെയര്‍മാന്‍ പദവിയില്‍ നിന്ന് അല്‍ ഫാലിഹിനെ ഒഴിവാക്കി പകരം യാസിര്‍ അല്‍റുമയ്യാനെ നിയമിച്ചത്. പുതിയ ഊര്‍ജമന്ത്രിയായി നിയമിതനായ അബ്ദുല്‍ അസീസ് ബിന്‍ സല്‍മാന്‍ ഈ രംഗത്ത് പരിചയസമ്പന്നനാണ്. 1985ല്‍ ഊര്‍ജമന്ത്രിയുടെ ഉപദേശക പദവി ഏറ്റെടുക്കുമ്പോള്‍ അദ്ദേഹത്തിന് 20 വയസേ ഉണ്ടായിരുന്നുള്ളൂ.