ചെറുവത്തൂര്‍: സംസ്ഥാന സ്‌കൂള്‍ കായികമേളയില്‍ ഡിസ്‌കസ് ത്രോയില്‍ സ്വര്‍ണം നേടിയ സിദ്ധാര്‍ഥിന് അനുമോദന പ്രവാഹം. സുവര്‍ണ നേട്ടവുമായി ജന്മനാടായ മയ്യിച്ചയില്‍ തിരിച്ചെത്തിയ സിദ്ധാര്‍ഥിനെ പി. കരുണാകരന്‍ എം.പി വീട്ടിലെത്തി അഭിനന്ദിച്ചു. ചെറുവത്തൂര്‍ ഗ്രാമപഞ്ചായത്ത് പ്രസിഡന്റ് മാധവന്‍ മണിയറയും അദ്ദേഹത്തോടൊപ്പം ഉണ്ടായിരുന്നു. ഷോട്ട്പുട്ടില്‍ കൂടി മത്സരിക്കാനുണ്ടായിരുന്നുവെങ്കിലും റാഞ്ചിയില്‍ നടക്കുന്ന ദേശീയ അമേച്വര്‍ അത്‌ലറ്റിക് മീറ്റില്‍ പങ്കെടുക്കേണ്ടതിനാല്‍ മത്സരിക്കാതെ സിദ്ധാര്‍ഥ് നാട്ടിലേക്കുമടങ്ങുകയായിരുന്നു.
കഴിഞ്ഞവര്‍ഷത്തെ ദേശീയ സ്വര്‍ണമെഡല്‍ ജേതാവ് മാര്‍ ബേയിസിലെ അലക്‌സ് തങ്കച്ചനെ മറികടന്നാണ് സിദ്ധാര്‍ഥ് കാസര്‍കോട്ടേക്ക് സ്വര്‍ണം എത്തിച്ചത്. കുട്ടമത്ത് ഗവ. ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥിയാണ്.