ആലപ്പുഴ: ഉത്സവകാലത്തോടനുബന്ധിച്ചുള്ള നാട്ടാന പരിപാലന ജില്ലാതല സമിതിയുടെ യോഗം കലക്ടറേറ്റില്‍ ചേര്‍ന്നു. ഇത് സംബന്ധിച്ച കര്‍ശന നിര്‍ദേശങ്ങള്‍ പാലിക്കുന്നത് ഉറപ്പാക്കാന്‍ തീരുമാനിച്ചു.
ഒരു ദിവസം ആറു മണിക്കൂറില്‍ കൂടുതല്‍ തുടര്‍ച്ചയായി ഒരേ ആനകളെ ഉപയോഗിക്കരുത്. ആനകളില്‍ നിന്നും നിശ്ചിത ദൂരം മാത്രമെ (കുറഞ്ഞത്മൂന്നു മീറ്റര്‍) ആളുകള്‍ നില്‍ക്കുവാനും സഞ്ചരിക്കുവാനും പാടുള്ളൂ. ആനയുമായി മറ്റുള്ളവര്‍ അടുത്തിടപഴകുന്നത് കര്‍ശനമായും വിലക്കേണ്ടതാണ്. പാപ്പാന്‍മാര്‍ മദ്യപിച്ച് ജോലിചെയ്യുവാന്‍ അനുവദിക്കരുത്. എഴുന്നള്ളിപ്പ് സമയത്ത് ആനകള്‍ തമ്മില്‍ മതിയായ അകലം പാലിക്കേണ്ടതാണ്. മദപ്പാടുള്ളത്, മദം ഒലിക്കുന്നത്, അസുഖം ഉള്ളത്, പരുക്കേറ്റത്, ക്ഷീണിതനായത്, ഗര്‍ഭിണി, അന്ധത ഉള്‍പ്പെടെയുള്ള ശാരീരിക വൈകല്യമുള്ള ആനകളെ ഉപയോഗിക്കരുത്. എഴുന്നള്ളിപ്പിനായി വെയിലത്ത് ആനയെ അധികസമയം നിര്‍ത്തുവാനോ, ആനയുടെ സമീപത്തുവച്ച് പടക്കം പൊട്ടിക്കുവാനോ പാടില്ല.
ആനയ്ക്ക് ആഹാരവും, വെള്ളവും ലഭിക്കുന്നുണ്ടെന്ന് ആനത്തൊഴിലാളികളും, ആഘോഷ കമ്മിറ്റി ഭാരവാഹികളും ഉറപ്പുവരുത്തേണ്ടതാണ്.തീവെട്ടി ആനകള്‍ക്ക് ചൂടേല്‍ക്കാത്തവിധം അകലം പാലിച്ച് പിടിക്കേണ്ടതാണ്. ഉത്സവസമയത്ത് ആനകള്‍ക്ക് ആവശ്യാനുസരണം ആഹാരവും, വെള്ളവും നല്‍കുകയും, കാലില്‍ ചൂടേല്‍ക്കാതിരിക്കുവാന്‍ നച്ച തറയില്‍ (ചാക്കില്‍) നിര്‍ത്തുകയും, വെയിലേല്‍ക്കാതിരിക്കുവാന്‍ പന്തല്‍പോലുള്ള സംവിധാനം ഒരുക്കുകയും ചെയ്യേണ്ടതാണ്.
എലിഫെന്റ് സ്‌ക്വാഡിലെ വെറ്റിനറി ഡോക്ടറുടെ സേവനം ഉത്സവകമ്മിറ്റി ഉറപ്പുവരുത്തേണ്ടതാണ്. ഇടഞ്ഞ ആനയെ ജീവഹാനിയ്ക്ക് കാരണമായ ആനയെ 15 ദിവസത്തേയ്ക്ക് ഉത്സവാഘോഷങ്ങളില്‍ പങ്കെടുപ്പിക്കുവാന്‍ പാടില്ലാത്തതും, 15 ദിവസത്തിനുശേഷം പ്രസ്തുത ആനയെ ഫോറസ്റ്റ് വെറ്റിനറി ഓഫീസറും, അതാതു ജില്ലയിലെ രണ്ടു സര്‍ക്കാര്‍ വെറ്റിനറി ഓഫീസര്‍മാരോ ജില്ലയിലെ മറ്റു രണ്ടു വെറ്റിനറി ഡോക്ടര്‍മാരോ ഉള്‍പ്പെടുന്ന മെഡിക്കല്‍ സംഘം ആനയെ പരിശോധിച്ച് മാനസിക, ശാരീരികനില തൃപ്തികരമാണെന്ന് സാക്ഷ്യപ്പെടുത്തിയാല്‍ മാത്രമെ വീണ്ടും എഴുന്നള്ളിക്കുവാന്‍ പാടുള്ളൂ.
ആനകളെ ഉപയോഗിച്ചുള്ള പുതിയ ഉത്സവങ്ങള്‍ക്ക് അനുമതി നല്‍കുന്നതല്ല.എലിഫന്റ് സ്‌ക്വാഡിന്റെ സേവനം ലഭ്യമാക്കുന്നതിനായി 9495314850 എന്ന നമ്പറില്‍ വെറ്റിനറി ഡോക്ടര്‍ എസ്. ബിജുവിനെ ബന്ധപ്പെടേണ്ടതാണ്.എ.ഡി.എം ഐ.അബ്ദുള്‍സാലാം അധ്യക്ഷത വഹിച്ചു.
ആലപ്പുഴ സോഷ്യല്‍ ഫോറസ്ട്രി അസി.ഫോറസ്റ്റ് കണ്‍സര്‍വേറ്റര്‍ സുമി ജോസഫ്, അഡ്മിനിസ്‌ട്രേഷന്‍ ഡിവൈ.എസ്സ്.പി. കെ.സജീവ്, സീനിയര്‍ വെറ്ററിനറി ഓഫിസര്‍ ഡോ.വിമല്‍ സേവ്യര്‍, ഫയര്‍ സ്റ്റേഷന്‍ ഓഫിസര്‍ എം.എ.ജോണിച്ചന്‍, ചെങ്ങന്നൂര്‍ റെയിഞ്ച് ഫോറസ്റ്റ് ഓഫിസര്‍ എന്‍.ഗണേശന്‍. ഫെസ്റ്റിവല്‍ കോ-ഓഡിനേഷന്‍ കമ്മറ്റി പ്രതിനിധി രാജേഷ് കുമാര്‍ എന്നീവര്‍ പങ്കെടുത്തു.