തൃശൂര്‍: അടിസ്ഥാന പരിശീലനം പൂര്‍ത്തിയാക്കിയ സിവില്‍ എക്‌സൈസ് ഓഫിസര്‍മാരുടെ ആദ്യ പാസിങ് ഔട്ട് ഇന്ന് രാവിലെ 8 ന് കേരള പോലീസ് അക്കാദമിയില്‍ നടക്കും. സംസ്ഥാന എക്‌സൈസ് കമ്മീഷണറും ഡയറക്ടര്‍ ജനറല്‍ ഓഫ് പൊലിസുമായ ഋഷിരാജ് സിങ്ങ് മുഖ്യാതിഥിയായിരിക്കും. കേരള പൊലിസ് അക്കാദമി അഡ്മിനിസ്‌ട്രേഷന്‍ അസിസ്റ്റന്റ് ഡയറക്ടര്‍ അനൂപ് കുരുവിള ജോണ്‍ സല്യൂട്ട് സ്വീകരിക്കും. സാധാരണ സിവില്‍ എക്‌സൈസ് ഓഫീസര്‍മാര്‍ക്ക് ജോലിയില്‍ പ്രവേശിച്ചതിനു ശേഷം സര്‍വ്വീസിനിടക്കു മാത്രമേ അടിസ്ഥാന പരിശീലനം ലഭിക്കാറുളളൂ. അതില്‍ നിന്നും വ്യത്യസ്തമായി കേരള എക്‌സൈസ് വകുപ്പ് ചരിത്രത്തിലാദ്യമായി അടിസ്ഥാന പരിശീലനം പൂര്‍ത്തിയാക്കിയതിനു ശേഷം സര്‍വ്വീസിലേക്ക് പ്രവേശിക്കുന്ന ആദ്യ ബാച്ച് സിവില്‍ എക്‌സൈസ് ഓഫിസര്‍മാരാണ് പാസിങ് ഔട്ട് പരേഡിനായി അണിനിരക്കുന്നത്. ഇവരില്‍ 84 ബിരുദധാരികളും, 27 ബിരുദാന്തരബിരുദം ഉളളവരും, 9 പേര്‍ ബി.ടെക്കും, 2 പേര്‍ ബി.എഡും, ഒരാള്‍ എല്‍.എല്‍.ബി യും, 4 പേര്‍ എം.ബി.എ യും, 3 പേര്‍ എം.സി.എയും, ഒരാള്‍ എം.എ.ബി.എഡും., ഒരാള്‍ എം.എ ക്രിമിനോളജിയും, 4 പേര്‍ ഡിപ്ലോമയും, 2 പേര്‍ ഐ.ടി.ഐ യും, 16 പേര്‍ പ്ലസ് ടു യോഗ്യത ഉളളവരുമാണ്. പരിശീലനത്തിന്റെ ഭാഗമായി വെപ്പണ്‍ ക്ലാസ്, കാരട്ടേ, യോഗ, സ്വിമ്മിംഗ്, ഡ്രൈവിംഗ്, കമ്പ്യൂട്ടര്‍, ഫയര്‍ ഫൈറ്റിംഗ് എന്നിവയിലായിരുന്നു ക്ലാസ്സുകള്‍. ചടങ്ങില്‍ ജനപ്രതിനിധികളും പൊലിസ്, എക്‌സൈസ് വകുപ്പിലെ ഉയര്‍ന്ന ഉദ്യോഗസ്ഥരും ട്രെയിനികളുടെ കുടുംബാംഗങ്ങളും സംബന്ധിക്കും.