ഓവല്‍: അഞ്ചാം ആഷസ് ടെസ്റ്റില്‍ ഇംഗ്ലണ്ട് കൂറ്റന്‍ ലീഡിലേക്ക്. മൂന്നാം ദിനം ഒടുവില്‍ വിവരം ലഭിക്കുമ്പോള്‍ രണ്ടാം ഇന്നിങ്‌സില്‍ അഞ്ച് വിക്കറ്റ് നഷ്ടത്തില്‍ 249 റണ്‍സെന്ന നിലയിലാണ് ആതിഥേയര്‍. ഇതോടെ ഇംഗ്ലണ്ടിന് അഞ്ച് വിക്കറ്റ് കൈയിലിരിക്കെ 324 റണ്‍സിന്റെ ലീഡായി.
ജോസ് ബട്ട്‌ലറും (15*) സാം കുറാനുമാണ് (0*) ക്രീസില്‍. ഇംഗ്ലണ്ടിന് വേണ്ടി ജോ ഡെന്‍ലി(94)യും ബെന്‍ സ്റ്റോക്‌സും (67) തിളങ്ങി. ആസ്‌ത്രേലിയക്കായി നഥാന്‍ ലിയോണ്‍ മൂന്ന് വിക്കറ്റ് വീഴ്ത്തി. നേരത്തേ ആദ്യ ഇന്നിങ്‌സില്‍ ഇംഗ്ലണ്ട് 294 റണ്‍സെടുത്തപ്പോള്‍ ഓസീസിന്റെ പോരാട്ടം 225 റണ്‍സില്‍ അവസാനിച്ചിരുന്നു.

സ്മിത്തിന് മറ്റൊരു റെക്കോര്‍ഡ് കൂടി

ഓവല്‍: മുന്‍ ഓസീസ് നായകന്‍ സ്റ്റീവ് സ്മിത്ത് മറ്റൊരു റെക്കോര്‍ഡിനു കൂടി ഉടമയായി. ആഷസ് അഞ്ചാം ടെസ്റ്റിലെ ആദ്യ ഇന്നിങ്‌സില്‍ അര്‍ധ ശതകം കുറിച്ചതോടെ ടെസ്റ്റില്‍ ഒരു ടീമിനെതിരേ തുടര്‍ച്ചയായി ഏറ്റവും കൂടുതല്‍ അര്‍ധ സെഞ്ചുറി നേടുന്ന താരമായി ക്ലാസ് ബാറ്റ്‌സ്മാന്‍ മാറി. പാക് ഇതിഹാസതാരം ഇന്‍സമാമുല്‍ ഹഖിനെയാണ് ഇക്കാര്യത്തില്‍ സ്മിത്ത് പിന്നിലാക്കിയത്. ഇംഗ്ലണ്ടിനെതിരേ തുടര്‍ച്ചയായ 10-ാം അര്‍ധ ശതകമായിരുന്നു വെള്ളിയാഴ്ച രാത്രി സ്മിത്ത് കുറിച്ചത്. ഇന്‍സമാമിന്റെ പേരിലായിരുന്നു ഈ റെക്കോര്‍ഡ്.