#മുഹമ്മദലി വാഫി തെന്നല

ഫുജൈറ: ലോകത്തിന് കാരുണ്യപ്രവര്‍ത്തനങ്ങളുടെ സുകൃതവഴി കാണിച്ചുകൊടുത്ത യുഎഇ രാഷ്ട്രപിതാവായ ഷെയ്ഖ് സായിദ് ബിന്‍ സുല്‍ത്താന്‍ അല്‍ നഹ്യാന്റെ സ്മരണകളുണര്‍ത്തി രാജ്യ വ്യാപകമായി ആഘോഷിച്ചു വരുന്ന സായിദ് വര്‍ഷാചരണത്തിന്റെ ഭാഗമായി സത്യധാര ഫുജൈറ റീജിയന്റെ കീഴില്‍ നാലുമാസമായി നടന്നു വരുന്ന സായിദ് ഇയറിന്റെ അന്താരാഷ്ട്ര സമ്മേളനം നവംബര്‍ രണ്ടിന് ഫുജൈറ കോണ്‍കോര്‍ഡ് ഹോട്ടലില്‍ നടക്കും.

യു എ ഇ ഫെഡറല്‍ നാഷണല്‍ മെമ്പര്‍ അഹ്മദ് മുഹമ്മദ് അല്‍ യമാഹി സമ്മേളനം ഉദ്ഘാടനം നിര്‍വഹിക്കുന്ന പരിപാടിയില്‍ വി ടി ബല്‍റാം എം ല്‍ എ മുഖ്യാതിഥിയായി പങ്കെടുക്കും. എസ് കെ എസ് എസ് എഫ് സംസ്ഥാന വൈസ് പ്രസിഡന്റ് ഡോ. ബഷീര്‍ ഫൈസി ദേശമംഗലം മുഖ്യപ്രഭാഷണം നടത്തും. കൂടാതെ യു എ ഇ എസ് കെ എസ് എസ് എഫ് നേതാക്കള്‍, മറ്റു മത സാമൂഹിക സാംസ്‌കാരിക നേതാക്കളും പങ്കെടുക്കും.
കഴിഞ്ഞ നാലുമാസമായി ഫുജൈറ സത്യധാര ഈസ്റ്റേണ്‍ റീജിയന്റെ കീഴില്‍ പണ്ഡിത സമ്മേളനം, കുടുംബ സംഗമം, പഠന യാത്ര, ഫ്രീഡം സ്‌ക്വയര്‍, ക്വിസ്സ് മത്സരം, ഹെല്പ് ഡെസ്‌ക്, ചരിത്ര സമ്മേളനം, ഫിഖ്ഹ് സെമിനാര്‍, സൂഫി മെഡിറ്റേഷന്‍ തുടങ്ങിയ പരിപാടികള്‍ ഫുജൈറ ഈസ്റ്റേണ്‍ റീജിയന്റെ ഭാഗമായ ഫുജൈറ, ദിബ്ബ, മസാഫി, കോര്‍ഫക്കാന്‍, തോബിയാണ്, മുറബ്ബ, കല്‍ബ, തുടങ്ങിയ പ്രദേശങ്ങളില്‍ നടത്തപ്പെട്ടു.

നവംബര്‍ രണ്ടിന് വൈകിട്ട് അഞ്ചു മണിക്ക് ബുര്‍ദാലാപനത്തോടുകൂടി ആരംഭിക്കുന്ന ഷെയ്ഖ് സായിദ് ഇന്റര്‍നാഷണല്‍ സമ്മേളനം വിജയിപ്പിക്കാന്‍ കഴിഞ്ഞ ദിവസം ഫുജൈറയില്‍ വിളിച്ചു ചേര്‍ത്ത വിപുലമായ സ്വാഗത സംഘം യു എ ഇ നാഷണല്‍ എസ് കെ എസ് എസ് എഫ് സീനിയര്‍ വൈസ് പ്രസിഡണ്ട് സയ്യിദ് അബ്ദുറഹ്മാന്‍ തങ്ങള്‍ ഉത്ഘാടനം ചെയ്തു. പരിപാടിയുടെ വിജയത്തിനായി വിവിധ സബ് കമ്മിറ്റികള്‍ രൂപീകരിച്ചു. യു എ ഇ യുടെ മുഴുവന്‍ എമിറേറ്റുകളില്‍ നിന്നും ആളുകള്‍ പങ്കെടുക്കുമെന്ന് സംഘാടകര്‍ പറഞ്ഞു.

രണ്ടായിരത്തോളം ആളുകളെ പങ്കെടുപ്പിക്കാനുള്ള വിശാലമായ ഒരുക്കങ്ങളാണ് ഫുജൈറയില്‍ ഒരുങ്ങിക്കഴിഞ്ഞതന്ന് ചെയര്‍മാന്‍ ശാക്കിര്‍ ഹുസ്സൈന്‍ ഹുദവിയും ജനറല്‍ കണ്‍വീനര്‍ സ്വാദിഖ് റഹ്മാനിയും അറിയിച്ചു.