ന്യൂഡല്‍ഹി: കേന്ദ്രമന്ത്രി ബാബുല്‍ സുപ്രിയോയെ കൊല്‍ക്കത്തയിലെ ജാധവ്പൂര്‍ യൂനിവേഴ്‌സിറ്റിയില്‍ ഇടത് അനുകൂല വിദ്യാര്‍ഥി സംഘടനാ പ്രവര്‍ത്തകര്‍ തടഞ്ഞുവച്ചു. തന്റെ കാര്‍ തടഞ്ഞ വിദ്യാര്‍ഥികള്‍ അപമര്യാദയായി പെരുമാറിയതായും മുടിയില്‍ പിടിച്ച് തള്ളിയതായും കേന്ദ്രമന്ത്രി ആരോപിച്ചു. മന്ത്രി ഇപ്പോഴും ക്യാംപസില്‍ കുടുങ്ങിക്കിടക്കുകയാണെന്ന് വാര്‍ത്താ ഏജന്‍സിയായ പി.ടി.ഐ റിപ്പോര്‍ട്ട് ചെയ്തു.

സംസ്ഥാന ഗവര്‍ണറും സര്‍വകലാശാല ചാന്‍സിലറുമായ ജഗ്ദീപ് ദങ്കറും സംഭവസ്ഥലത്തുണ്ടെന്നാണ് ലഭിക്കുന്ന വിവരം. കോളജിലെ എ.ബി.വി.പി സംഘടിപ്പിച്ച സെമിനാറില്‍ സംബന്ധിക്കാനാണ് കേന്ദ്രമന്ത്രി എത്തിയത്. എന്നാല്‍ എസ്.എഫ്.ഐ, എ.എഫ്.എസ്.യു തുടങ്ങിയ വിദ്യാര്‍ഥി സംഘടനകളുടെ നേതൃത്വത്തില്‍ കരിങ്കൊടി വീശി മന്ത്രിയുടെ കാര്‍ തടയുകയായിരുന്നു. ബാബുല്‍ സുപ്രിയോ ഗോ ബാക്ക് വിളിക്കുകയും ചെയ്തു. തങ്ങള്‍ നക്‌സലുകളാണെന്ന് ഉറക്കെ വിളിച്ച് പറഞ്ഞ് വിദ്യാര്‍ഥികള്‍ തന്നെ പ്രകോപിപ്പിക്കാന്‍ ശ്രമിച്ചതായി സുപ്രിയോ പറഞ്ഞു.

താന്‍ ഇവിടെ രാഷ്ട്രീയ കളിക്കാന്‍ വേണ്ടി വന്നതല്ല, എന്നാല്‍ വിദ്യാര്‍ഥികളുടെ മനോഭാവം എന്നില്‍ ഞെട്ടലുളവാക്കി. ചിലര്‍ തന്റെ മുടി പിടിച്ച് തള്ളിയതായും അദ്ദേഹം ആരോപിച്ചു. അതേസമയം സര്‍വകലാശാല വൈസ് ചാന്‍സിലര്‍ സുരന്‍ജന്‍ ദാസ് വിദ്യാര്‍ഥികളുമായി സംസാരിച്ച് പ്രശ്‌നം പരിഹരിക്കുന്നതിനുള്ള ശ്രമം നടത്തുന്നുണ്ട്.