വെഞ്ഞാറമൂട്: കെ.എസ്.ആര്‍.ടി.സി ബസും പിക് അപ് ഓട്ടോയും കൂട്ടിയിടിച്ച് മത്സ്യവില്‍പനക്കാരനായ യുവാവ് മരിച്ചു. വേറ്റിനാട് മണ്ഡപം, വിനോദ് ഭവനില്‍, വിനോദ് (സക്കീര്‍ 32) ആണ് മരിച്ചത്. പുലര്‍ച്ചെ 7.30 ന് കന്യാകുളങ്ങര പെരുങ്കൂര്‍ ജങ്ഷന് സമീപത്ത് വച്ചായിരുന്നു അപകടം. കന്യക്കുളങ്ങര ഭാഗത്തു നിന്ന് മത്സ്യവില്‍പന നടത്തി വട്ടപ്പാറയിലേയ്ക്ക് പോകുകയായിരുന്ന വിനോദിന്റെ പിക് അപ് ഓട്ടോയില്‍ കിഴക്കേക്കോട്ടയില്‍ നിന്ന് വെഞ്ഞാറമൂട് ഡിപ്പോയിലേയ്ക്ക് വരുകയായിരുന്ന സിറ്റി ഡിപ്പോയിലെ കെ.എസ്.ആര്‍.ടി.സി ബസ് ഇടിച്ചായിരുന്നു അപകടം. ഇടിയുടെ ആഘാതത്തില്‍ ഓട്ടോ പൂര്‍ണമായും തകര്‍ന്നു. നാട്ടുകാര്‍ വിനോദിനെ തിരുവനന്തപുരം മെഡിക്കല്‍ കോളജ് ആശുപത്രിയില്‍ എത്തിച്ചുവെങ്കിലും അല്‍പസമയത്തിനകം തന്നെ വിനോദ് മരണപ്പെടുകയായിരുന്നു. ഭാര്യ സുറുമി, മകള്‍ ആദിയ (ആറുമാസം).