ദോഹ: ഖത്തര്‍ ഫുട്‌ബോള്‍ ടീമിനെതിരേ ഫിഫ അച്ചടക്ക നടപടി സ്വീകരിച്ചേക്കും. ഖത്തര്‍ അമീറിന് ഐക്യദാര്‍ഢ്യം പ്രഖ്യാപിച്ച് അദ്ദേഹത്തിന്റെ മുഖത്തിന്റെ ചിത്രം പതിച്ച ജേഴ്‌സിയണിഞ്ഞ് മൈതാനത്തിറങ്ങിയതാണ് ടീമിന് പുലിവാലായത്. ദക്ഷിണ കൊറിയക്കെതിരായ ലോകകപ്പ് യോഗ്യതാ പോരാട്ടത്തിന് മുന്‍പ് വാം അപ്പിനായി മൈതാനത്തിറങ്ങിയ പല താരങ്ങളും ഇത്തരം ജേഴ്‌സിയണിഞ്ഞാണ് കളിച്ചത്. മത്സരത്തിന്റെ 25ാം മിനുട്ടില്‍ ഖത്തര്‍ ഗോള്‍ നേടിയപ്പോള്‍ മധ്യനിര താരം ഹസന്‍ അല്‍ ഹൈദോസ് ഈ ജേഴ്‌സി ഉയര്‍ത്തി ആഹ്ലാദവും പ്രകടിപ്പിച്ചിരുന്നു. സ്റ്റേഡിയത്തിലും പുറത്തും അദ്ദേഹത്തെ അനുകൂലിക്കുന്നവര്‍ അമീറിന്റെ മുഖത്തിന്റെ ചിത്രം പതിച്ച പോസ്റ്ററുകളും വിതരണം ചെയ്തിരുന്നു.