കുറ്റിക്കോല്‍: രണ്ടായിരത്തിന്റെ വ്യാജനോട്ട് നല്‍കി മത്സ്യ വില്‍പനക്കാരിയെ കബളിപ്പിച്ചു. കഴിഞ്ഞ ദിവസം കുണ്ടംകുഴിയിലെ മീന്‍ കച്ചവടക്കാരി സുജാതയാണ് തട്ടിപ്പിനിരയായത്. മീന്‍ വാങ്ങാനെത്തിയ യുവാവ് രണ്ടായിരത്തിന്റെ ഫോട്ടോസ്റ്റാറ്റ് നോട്ട് നല്‍കി 500 രൂപയുടെ മീന്‍ വാങ്ങിയ ശേഷം 1500 രൂപ ബാക്കിയും വാങ്ങി കടന്നു കളയുകയായിരുന്നു. അല്‍പസമയം കഴിഞ്ഞ് നോട്ട് എടുത്തു നോക്കിയപ്പോഴാണ് വ്യാജമെന്ന് മനസിലായത്. 2000 രൂപയുടെ ശരിക്കുള്ള നോട്ടിന്റെ ഇരുപുറവും വെള്ളക്കടലാസില്‍ കളര്‍ ഫോട്ടോസ്റ്റാറ്റ് എടുത്തശേഷം കത്രിക കൊണ്ട് മുറിച്ചെടുത്ത് ഒട്ടിച്ചാണ് വ്യാജനോട്ട് ഉണ്ടാക്കിയത്. ഒറ്റ നോട്ടത്തില്‍ തന്നെ തിരിച്ചറിയാന്‍ കഴിയുന്ന തരത്തിലാണ് നോട്ട് നിര്‍മിച്ചിരിക്കുന്നത്. വ്യാജനോട്ട് തട്ടിപ്പ് മലയോരത്തെ വ്യാപാരികളെ ആശങ്കയിലാക്കിയിരിക്കുകയാണ്.