ന്യൂഡല്‍ഹി: ഐ.എസ്.എല്‍ ഡല്‍ഹി ഡൈനാമോസ് - ജംഷഡ്പുര്‍ എഫ്.സി മത്സരം സമനിലയില്‍. ഇരു ടീമുകളും രണ്ട് ഗോള്‍ വീതം നേടിയാണ് സമനിലയില്‍ പിരിഞ്ഞത്. 39ാം മിനുട്ടില്‍ സെര്‍ജിയോ സിഡോഞ്ചയുടെ ഗോളില്‍ മുന്നില്‍ കടന്നതിന് ശേഷം രണ്ട് ഗോളിന് പിറകില്‍ പോയ ജംഷഡ്പുര്‍ 72ാം മിനുട്ടില്‍ തിരി നേടിയ ഗോളിലാണ് അര്‍ഹിച്ച സമനില നേടിയെടുത്തത്. ഡല്‍ഹിക്ക് വേണ്ടി ലാലിയന്‍സുല ചങ്‌തെ (55), അഡ്രിയ കാര്‍മോണ (58) എന്നിവരാണ് ഗോള്‍ നേടിയത്. സമനിലയോടെ ജംഷഡ്പൂര്‍ പട്ടികയില്‍ ഒന്നാം സ്ഥാനത്തേക്ക് കയറി. ഏഴ് മത്സരങ്ങളില്‍നിന്ന് രണ്ട് ജയവും അഞ്ച് സമനിലയുമടക്കം 11 പോയിന്റോടെയാണ് ജംഷഡ്പുര്‍ പട്ടികയില്‍ മുന്നേറ്റം നടത്തിയത്.
രണ്ടാം സ്ഥാനത്തുള്ള നോര്‍ത്ത്ഈസ്റ്റ് യുനൈറ്റഡിനും 11 പോയിന്റാണെങ്കിലും ഗോള്‍ വ്യത്യാസത്തിന്റെ അടിസ്ഥാനത്തിലാണ് ജംഷഡ്പുര്‍ മുന്നില്‍ കടന്നത്. നാല് സമനിലയും മൂന്ന് തോല്‍വിയുമായി ഡല്‍ഹി പോയിന്റ് പട്ടികയില്‍ എട്ടാം സ്ഥാനത്താണ്.