കൊച്ചി: നെടുമ്പാശ്ശേരി സ്വര്‍ണക്കടത്തു കേസിലെ പ്രതികള്‍ക്ക് വേണ്ടി എന്‍.ഐ.എ അഭിഭാഷകന്‍ ഹൈക്കോടതിയില്‍ ഹാജരായത് വിവാദമായി. എന്‍.ഐ. എ അഭിഭാഷകന്‍ കള്ളക്കടത്തു കേസിലെ പ്രതികള്‍ക്കു വേണ്ടി ഹാജരാകുന്നതിലെ അധാര്‍മികത ചൂണ്ടിക്കാട്ടി കൊച്ചി കസ്റ്റംസ് കമ്മിഷണര്‍ ഡോ. കെ.എന്‍ രാഘവന്‍ എന്‍.ഐ.എ ഡയറക്ടര്‍ ജനറലിന് കത്തയച്ചു. എന്‍.ഐ. എ അഭിഭാഷകന്‍ ഹാജരായത് രാജ്യതാല്‍പര്യത്തിനെതിരാണെന്നും തുടര്‍ന്ന് ഹാജരാകുന്നതില്‍ നിന്ന് ഈ അഭിഭാഷകനെ ഒഴിവാക്കണമെന്നും ആവശ്യപ്പെട്ടാണ് ഡോ. കെ.എന്‍ രാഘവന്‍ ഡയറക്ടര്‍ ജനറലിന് കത്ത് നല്‍കിയത്.

സ്വര്‍ണക്കടത്ത് കേസില്‍ കോഫെപോസ നിയമപ്രകാരം കരുതല്‍ തടങ്കലില്‍ കഴിയുന്ന ജാബിന്‍ കെ. ബഷീര്‍, ഷിനോയ് കെ. തോമസ് എന്നിവര്‍ക്ക് വേണ്ടിയാണ് ദേശീയ അന്വേഷണ ഏജന്‍സിയുടെ സ്റ്റാന്റിങ് കോണ്‍സലായ അഡ്വ. എം.അജയ് ഹൈക്കോടതിയില്‍ ഹാജരായത്. കരുതല്‍ തടങ്കല്‍ ഉത്തരവ് റദ്ദാക്കണമെന്നാവശ്യപ്പെട്ടാണ് പ്രതികള്‍ ഹൈക്കോടതിയില്‍ ഹരജി നല്‍കിയിട്ടുള്ളത്.

ഈ കേസില്‍ പ്രതിയുടെ ആളുകള്‍ കൈക്കൂലി വാഗ്ദാനം ചെയ്തതിനെ തുടര്‍ന്ന് ഹൈക്കോടതി ജസ്റ്റിസ് കെ.ടി ശങ്കരന്‍ കേസ് കേള്‍ക്കുന്നതില്‍ നിന്ന് പിന്‍മാറിയത് വിജിലന്‍സ് അന്വേഷണത്തിലാണ്.