ഇരിക്കൂര്‍: പാതയോരങ്ങളിലും ബസ്‌സ്റ്റാന്റുകളിലുമുള്ള അനധികൃത ഫ്‌ളക്‌സ് ബോര്‍ഡുകള്‍ നീക്കം ചെയ്യണമെന്ന ഹൈക്കോടതി ഉത്തരവിനെ തുടര്‍ന്നു ഇരിക്കൂര്‍ പഞ്ചായത്തിലെ അനധികൃത ഫ്‌ളക്‌സ് ബോര്‍ഡുകള്‍ നീക്കിതുടങ്ങി.
ഒക്ടോബര്‍ 30നകം നീക്കം ചെയ്യണമെന്ന ഉത്തരവ് പൂര്‍ത്തിയാക്കാനായില്ലെങ്കിലും ഉദ്യോഗസ്ഥര്‍ ഇപ്പോഴും നീക്കല്‍ നടപടി തുടരുകയാണ്. പഞ്ചായത്തിലെ ഉദ്യോഗസ്ഥര്‍ വാഹനങ്ങളില്‍ സഞ്ചരിച്ചാണ് പാതയോരത്തെ വൈദ്യുതി, ടെലിഫോണ്‍ തൂണുകളിലെ ബോര്‍ഡുകള്‍ നീക്കുന്നത്.
ഇവയെല്ലാം ശേഖരിച്ച് പഞ്ചായത്ത് ഓഫിസിനു സമീപത്ത് ശേഖരിച്ച് മാലിന്യകേന്ദ്രത്തിലേക്ക് കൊണ്ടുപോകാനുള്ള നടപടി സ്വീകരിക്കും. ഇരിക്കൂര്‍ പഞ്ചായത്തിലും പടിയൂര്‍, കൂടാളി, മലപ്പട്ടം പഞ്ചായത്തുകളിലും ഫ്‌ളക്‌സ് ബോര്‍ഡ് ശേഖരണം ദിവസങ്ങള്‍ക്ക് മുന്‍പ് ആരംഭിച്ചെങ്കിലും പൂര്‍ത്തിയായില്ല.
ശേഖരിക്കുന്ന ഫ്‌ളക്‌സ് ബോര്‍ഡുകള്‍ പ്രതീക്ഷിച്ചതിലും പതിന്മടങ്ങ് കൂടുതല്ലുള്ളതിനാല്‍ എന്തു ചെയ്യണമെന്ന ആശങ്കയും പഞ്ചായത്തുകള്‍ക്കുണ്ട്.