തൃശൂര്‍: ഉദ്ഘാടനത്തിനെത്തിയ മുഖ്യമന്ത്രിയെ സ്വീകരിക്കാന്‍ ഗുരുവായൂരിലെ ആനകളെ നല്‍കിയ സംഭവത്തില്‍ പ്രതിഷേധവുമായി കോണ്‍ഗ്രസ്.
കഴിഞ്ഞ ദിവസം പുതിയ ടെംമ്പിള്‍ സ്റ്റേഷന്‍ ശിലാസ്ഥാപനത്തിനെത്തിയ മുഖ്യമന്ത്രിയെ സ്വീകരിക്കാനാണ് ദേവസ്വത്തിന്റെ മൂന്ന് ആനകളെ വിട്ടു നല്‍കിയത്. മുന്‍കൂര്‍ അനുമതി വാങ്ങാതെ നടത്തിയ എഴുന്നള്ളിപ്പിനെതിരെ പ്രതിഷേധം കനക്കുകയാണ്. മുഖ്യമന്ത്രിയെ സ്വീകരിക്കാന്‍ ദേവസ്വത്തിലെ ആനകളെ ഉപയോഗപ്പെടുത്തിയത് ദൈവനിന്ദയാണെന്ന് കെ.പി.സി.സി ജനറല്‍ സെക്രട്ടറി ശൂരനാട് രാജശേഖരന്‍ പറഞ്ഞു. വിശ്വാസികളുടെ സങ്കേതമാണ് ഗുരുവായൂര്‍. അവിടെയുള്ള ആനകളെ സി.പി.എം മുഖ്യമന്ത്രിക്ക് അകമ്പടി സേവിക്കാന്‍ വിട്ട ദേവസ്വം ബോര്‍ഡ് ഭക്തരോടുള്ള അവഹേളനമാണ് കാണിച്ചതെന്നും അദ്ദേഹം പറഞ്ഞു.