പാനൂര്‍ :ചെണ്ടയാട് ഗുരുദേവ സ്മാരകം യു.പി സ്‌കൂളിന് സമീപം കുനിയില്‍ നാണു മാസ്റ്റരുടെ വീട്ടുമുറ്റത്ത് നിര്‍ത്തിയിട്ട കാര്‍ അടിച്ചുതകര്‍ത്തു.

ഇന്നു പുലര്‍ച്ചെ രണ്ടര മണിക്ക് ശേഷമാണ് അക്രമം. കാറിന്റെ പിന്‍ഭാഗത്തെ ഗ്ലാസ് മുഴുവന്‍ തകര്‍ന്നിട്ടുണ്ട്. പ്രദേശത്ത് ഇന്നലെ രണ്ടു കല്യാണങ്ങള്‍ നടന്നിരുന്നു.

എല്‍.ജെ.ഡി അനുഭാവിയായ നാണു മാസ്റ്റരുടെ ഭാര്യ വിമലടീച്ചറുടെ പേരിലാണ് തകര്‍ക്കപ്പെട്ട കാര്‍.

ഇലക്ട്രിക് പോസ്റ്റില്‍ എഴുതുന്നതുമായി ബന്ധപ്പെട്ട് പ്രദേശത്ത് സി.പി.എം.-ബി.ജെ.പി സംഘര്‍ഷാവസ്ഥനിലനില്‍ക്കുന്നുണ്ടായിരുന്നു.

കല്യാണ വീടിന് സമീപം ആര്‍.എസ്.എസ് നിരോധിത മേഖല എന്ന് ഇലക്ട്രിക് പോസ്റ്റില്‍ സി.പി.എം പ്രവര്‍ത്തകര്‍ എഴുതി വച്ചതാണ് സംഘര്‍ഷാവസ്ഥയ്ക്ക് കാരണം. ഇത് പൊലിസ് ഇടപെട്ട് നീക്കം ചെയ്തിരുന്നു.

പാനൂര്‍ പൊലിസ് സ്‌റ്റേഷനില്‍ ചേര്‍ന്ന സര്‍വ്വകക്ഷി യോഗ തീരുമാനത്തിന് വിരുദ്ധമായി ഇലക്ട്രിക് പോസ്റ്റില്‍ എഴുതുന്നത് പ്രദേശത്ത് പലപ്പോഴും സംഘര്‍ഷം സൃഷ്ടിക്കുന്നുണ്ട്.

സംഭവത്തില്‍ പുത്തൂര്‍ മണ്ഡലം കോണ്‍ഗ്രസ്സ് പ്രസിഡന്റ് കെ.പി.രാമചന്ദ്രന്‍ പ്രതിഷേധം രേഖപ്പെടുത്തി.