റിയാദ്: സഊദിയിലെ നജ്‌റാനിലെ ശറൂറയില്‍ രണ്ടര മാസം മുന്‍പ് മരിച്ച നിലയില്‍ കാണപ്പെട്ട മലപ്പുറം സ്വദേശികളുടെ മൃതദേഹം മറവ് ചെയ്തു. തിരൂര്‍ കുറ്റിപ്പാല സ്വദേശി പറമ്പന്‍ ബീരാന്റെ(40)യും ചുങ്കത്തറ മാണാലി സ്വദേശി ഓമനക്കുട്ട (42)ന്റെയും മൃതദേഹങ്ങളാണ് മറവ് ചെയ്തത്.

ബീരാന്റെ മൃതദേഹം ഷറൂറ ഖബര്‍സ്ഥാനിലും ഓമനക്കുട്ടന്റെ മൃതദേഹം നജ്‌റാന്‍ പൊതു ശ്മശാനത്തിലുമാണ് സംസ്‌കരിച്ചത്. കഴിഞ്ഞ ഓഗസ്റ്റ് ആദ്യ വാരത്തിലാണ് താമസ സ്ഥലത്ത് വെച്ചു രണ്ട് പേരെയും മരിച്ച നിലയില്‍ കാണപ്പെട്ടത്. മൂന്ന് ദിവസമായിട്ടും ഇവരെ കാണാത്തതിനെ തുടര്‍ന്ന് സ്‌പോണ്‍സര്‍ വിവരമറിയിച്ചത് പ്രകാരം പോലീസ് എത്തി മുറി തുറന്നപ്പോഴാണ് മരണവിവരം സ്ഥിരീകരിച്ചത്. ആറുവര്‍ഷത്തോളമായി ഓമനകുട്ടന്‍ ഷറൂറയില്‍ ജോലിചെയ്യുന്നു. പിതാവ്: ഭാസ്‌ക്കരന്‍. മാതാവ്: കല്യാണി. ഭാര്യ: രജനി. മക്കള്‍: അരുണ്‍, ധന്യ, ഐഷര്യ.

ഏഴ് വര്‍ഷമായി ഷറൂറയില്‍ ജോലി ചെയ്തു വരികയായിരുന്ന ബീരാന്‍ മൂന്നര വര്‍ഷം മുന്‍പാണ് അവധിക്ക് നാട്ടില്‍ പോയി വന്നത്. ആഗസ്റ്റില്‍ നാട്ടില്‍ പോകാനിരുന്നതാണ്. പിതാവ്: പരേതനായ കുഞ്ഞഹമ്മദ്. മാതാവ്: ഫാത്തിമ. ഭാരൃ: സകീനത്ത്. മകള്‍: മിന്ഹ ഫാത്തിമ. മറവ് ചെയ്യുന്നതിനുള്ള നടപടി ക്രമങ്ങള്‍ക്ക് പൊതു പ്രവര്‍ത്തകരായ റാസിഖ് ഫൈറൂസ് വെളിമുക്ക്, റഫീഖ് കുന്നംകുളം, അബ്ദുറഹ്മാന്‍ ബന്ദിയോട്, ബഷീര്‍ ചുങ്കത്തറ, റഫീഖ് കിണാശ്ശേരി എന്നിവര്‍ രംഗത്തുണ്ടായിരുന്നു.