ലണ്ടന്‍: 11ാം ഏകദിന സെഞ്ച്വറി നേടി ഇന്ത്യയെ ഐ.സി.സി ചാംപ്യന്‍സ് ട്രോഫിയുടെ ഫൈനലിലേക്ക് എത്തിച്ച ഓപണര്‍ രോഹിത് ശര്‍മ ഒരപൂര്‍വ നേട്ടത്തില്‍ കണ്ണിയായി. ഇംഗ്ലണ്ടിന്റെ മണ്ണില്‍ ക്രിക്കറ്റിലെ മൂന്ന് വിഭാഗങ്ങളിലുമായി പിറക്കുന്ന ആയിരാം സെഞ്ച്വറിയാണ് രോഹിത് ബിര്‍മിങ്ഹാമില്‍ ബംഗ്ലാദേശിനെതിരേ നേടിയത്. ഒരു രാജ്യത്ത് ക്രിക്കറ്റില്‍ ആയിരം ശതകങ്ങള്‍ പിറക്കുന്നതും ആദ്യമായാണ്. 971 മത്സരങ്ങളില്‍ നിന്നാണ് ഇംഗ്ലണ്ടില്‍ 1000 സെഞ്ച്വറികള്‍ പിറന്നത്. ആസ്‌ത്രേലിയയാണ് രണ്ടാമത്. 994 സെഞ്ച്വറികളാണ് ഓസീസ് മണ്ണില്‍ താരങ്ങള്‍ നേടിയത്. ഇംഗ്ലണ്ടില്‍ പിറന്ന 1000 സെഞ്ച്വറികളില്‍ 836 എണ്ണം ടെസ്റ്റിലും ഒന്ന് ടി20യിലും ബാക്കി ഏകദിനത്തിലുമാണ്. 2013ല്‍ ആരോണ്‍ ഫിഞ്ചാണ് ഇംഗ്ലീഷ് മണ്ണില്‍ ഏക ടി20 സെഞ്ച്വറി കണ്ടെത്തിയ താരം. 156 റണ്‍സാണ് താരം നേടിയത്. ബംഗ്ലാദേശിനെതിരേ രോഹിത് ശര്‍മ നേടിയ 123 റണ്‍സ് ഇംഗ്ലീഷ് മണ്ണിലെ 163ാം ഏകദിന സെഞ്ച്വറിയായിരുന്നു. പട്ടികയില്‍ ഇന്ത്യ മൂന്നാം സ്ഥാനത്താണ്. 739 മത്സരങ്ങളില്‍ നിന്നായി ഇന്ത്യന്‍ മണ്ണില്‍ ഇതുവരെ പിറന്നത് 701 ശതകങ്ങളാണ്. ടെസ്റ്റില്‍ 465ഉം ഏകദിനത്തില്‍ 233ഉം ടി20യില്‍ രണ്ടും സെഞ്ച്വറികള്‍.