നെയ്യാറ്റിന്‍കര: അമരവിള എക്‌സൈസ് ചെക് പോസ്റ്റില്‍ തമിഴ്‌നാട് ട്രാന്‍സ് പോര്‍ട്ട് ബസില്‍ കടത്തിയ എട്ടുകിലോ ചന്ദനത്തടി പിടികൂടി. ഇന്നലെ രാവിലെ 8.30 തോടൂകൂടി മണ്ടയ്ക്കാട് നിന്നും തിരുവനന്തപുരത്തേയ്ക്ക് വരികയായിരുന്ന ടി.എന്‍ -74 എന്‍.1773 -ാം നമ്പര്‍ ബസിലെ സീറ്റിനടിയില്‍ ഉടമസ്ഥനില്ലാതെ ബാഗിനുളളില്‍ ഒളിപ്പിച്ച നിലയിലായിരുന്നു തടി കൊണ്ട് വന്നത്.

ഒരടി നീളത്തിലുളള പതിനൊന്ന് കഷ്ണങ്ങളാക്കിയാണ് ചന്ദനം കൊണ്ട് വന്നത്. പൊതു വിപണിയില്‍ ഒന്നേകാല്‍ ലക്ഷത്തോളം രൂപ വില വരും. സെയില്‍ ടാക്‌സ് ഇന്‍സ്‌പെക്ടര്‍ അജിത്കുമാറിന്റെ നേതൃത്വത്തിലുളള ഉദ്യോഗസ്ഥരാണ് വാഹന പരിശോധനയ്ക്കിടെ ചന്ദനത്തടി കണ്ടെത്തിയത്. സെയില്‍ ടാക്‌സ് വിഭാഗം അറിയിച്ചതനുസരിച്ച് പരുത്തിപള്ളി ഫോറസ്റ്റ് റേഞ്ച് അധികൃതര്‍ എത്തി ചന്ദനം കൈപ്പറ്റി.