പള്ളുരുത്തി: കുമ്പളങ്ങി പെരുമ്പടപ്പ് പാലത്തിന് സമീപം മാലിന്യ നിക്ഷേപം നടത്തുന്നവരെ കൈയോടെ പിടികൂടിയ ശേഷം ബോധവത്കരണം നടത്തി പെരുമ്പടപ്പ് സൗത്ത് റസിഡന്റ്‌സ് അസോസിയേഷന്‍ അംഗങ്ങള്‍ നടത്തിയ മാലിന്യ നിക്ഷേപത്തിനെതിരേ ജനകീയ കൂട്ടായ്മ ശ്രദ്ധേയമായി. 

കുമ്പളങ്ങിയുടെ പ്രവേശന കവാടമായ പെരുമ്പടപ്പില്‍ അയല്‍ ജില്ലകളില്‍ നിന്നുപോലും വന്‍തോതില്‍ മാലിന്യം നിക്ഷേപിക്കപ്പെടുകയാണെന്ന് നാട്ടുകാര്‍ പറഞ്ഞു. ഞായറാഴ്ച വൈകിട്ട് ആരംഭിച്ച ശ്രദ്ധക്ഷണിക്കല്‍ സായാഹ്നത്തോടെയാണ് പ്രതിഷേധ പരിപാടികള്‍ ആരംഭിച്ചത്. മാലിന്യ മുക്ത പെരുമ്പടപ്പ് കാംപയിന്റെ ഭാഗമായി ഒത്തുചേര്‍ന്നവര്‍ നേരം പുലരും വരെ അംഗങ്ങള്‍ റോഡരുകില്‍ തീര്‍ത്ത പന്തലില്‍ നിലയുറപ്പിച്ചു.
ഇതിനിടയില്‍ പ്രതിഷേധ പരിപാടി അറിയാതെ ചിലര്‍ മാലിന്യ നിക്ഷേപം നടത്താന്‍ ഇവിടെയെത്തി അവരോട് മാലിന്യ നിക്ഷേപം നടത്തരുതെന്ന് ആവശ്യപ്പെട്ട ശേഷം മാലിന്യ നിര്‍മ്മാര്‍ജനത്തെപ്പറ്റി ബോധവത്കരണവും നടത്തി പറഞ്ഞു വിടുകയായിരുന്നു. തിങ്കളാഴ്ച പുലര്‍ച്ചെ വരെ അംഗങ്ങള്‍ ഇവിടെ തന്നെ നിലയുറപ്പിച്ചു. നഗരസഭാംഗം ജലജാമണി ഉദ്ഘാടനം നിര്‍വഹിച്ചു. പ്രസിഡന്റ് എന്‍ പി.സജ്ജീവന്‍ അധ്യക്ഷത വഹിച്ചു. ആന്റണി കുരിശിങ്കല്‍, ലൂസീ ജോസഫ്, ടി.ബി.ജോഷി, കെ.എ ബാബു, പി.എം മനോജ് എന്നിവര്‍ ആശംസകള്‍ നേര്‍ന്നു.