പുത്തനത്താണി: ഇരുചക്രവാഹനങ്ങളില്‍ ചീറിപ്പായുന്ന കൗമാരക്കാരെ പിടികൂടാന്‍ കല്‍പകഞ്ചേരി പൊലിസ് രംഗത്ത്. എസ്.ഐ കെ. പ്രിയന്റെ നേതൃത്വത്തിലുള്ള പൊലിസ് സംഘം വിരിച്ച വലയില്‍ ഒറ്റദിവസം കുടുങ്ങിയത് അന്‍പതോളം കുട്ടി ഡ്രൈവര്‍മാര്‍. നിരവധി വിദ്യാഭ്യാസ സ്ഥാപനങ്ങളുള്ള കടുങ്ങാത്തുകുണ്ടിലും പരിസരത്തും മിക്ക വിദ്യാര്‍ഥികളും സ്ഥാപനങ്ങളിലേക്കെത്തുന്നത് ബൈക്കുകളിലാണ്. അമിതവേഗത, ഹെല്‍മെറ്റ്, ലൈസന്‍സ്, മതിയായ രേഖകള്‍ എന്നിവ ഇല്ലാത്ത അന്‍പതോളം ബൈക്കുകളാണ് പിടികൂടിയത്.
പിടികൂടിയതില്‍ മിക്ക ഡ്രൈവര്‍മാരും പ്രായപൂര്‍ത്തിയാവാത്ത വിദ്യാര്‍ഥികളാണ്. പിടിച്ചെടുത്ത വാഹനങ്ങള്‍ക്ക് മതിയായ രേഖകള്‍ ഹാജരാക്കിയാല്‍ മാത്രമേ വാഹനങ്ങള്‍ വിട്ടുനല്‍കയുള്ളൂയെന്നും വരുംദിവസങ്ങളില്‍ അന്വേഷണം ഊര്‍ജിതമാക്കുമെന്നും കുട്ടികള്‍ക്ക് ബൈക്ക് നല്‍കുന്ന രക്ഷിതാക്കള്‍ ജാഗ്രത പാലിക്കണമെന്നും എസ്.ഐ കെ. പ്രിയന്‍ പറഞ്ഞു. എ.എസ്.ഐ സുധീഷ് കുമാര്‍, പ്രജീഷ് തേഞ്ചേരി, സി.പി.ഒ മാരായ പി. സജികുമാര്‍, ആര്‍. ശരത്, കെ. സുജിത്ത്, സോണി എന്നിവരും സംഘത്തിലുണ്ടായിരുന്നു.