ബംഗളൂരു: വിജയ് ഹസാരെ ക്രിക്കറ്റ് ടൂര്‍ണമെന്റില്‍ മലയാളി താരം സഞ്ജു സാംസണിന്റെ ഇരട്ട സെഞ്ച്വറിയിലേറി ഗോവയെ തകര്‍ത്ത് കേരളം. 378 റണ്‍സ് വിജയലക്ഷ്യവുമായി ഇറങ്ങിയ ഗോവയുടെ ഇന്നിങ്‌സ് മഴപെയ്തതോടെ 31 ഓവറില്‍ മൂന്ന് വിക്കറ്റ് നഷ്ടത്തില്‍ 153 റണ്‍സില്‍ ഒതുങ്ങി. പിന്നീട് മഴനിയമപ്രകാരം കേരളത്തെ വിജയികളായി പ്രഖ്യാപിക്കുകയായിരുന്നു.

നേരത്തേ ടോസ് നേടി ബാറ്റിങ്ങിനിറങ്ങിയ കേരളത്തെ ഇരട്ട സെഞ്ച്വറി നേടിയ സഞ്ജുവും സെഞ്ച്വറി നേടിയ സച്ചിന്‍ ബേബിയും ചേര്‍ന്നാണ് കൂറ്റന്‍ സ്‌കോറിലെത്തിച്ചത്. 21 ബൗണ്ടറികളും 10 സിക്‌സറുകളുമായി വെടിക്കെട്ട് ബാറ്റിങ് പ്രകടനത്തോടെയാണ് കേവലം 125 പന്തുകളില്‍ നിന്നും ഇരട്ട സെഞ്ച്വറി നേടിയത്. 1994ല്‍ വോര്‍സെസ്റ്റര്‍ഷെയറിനായി ടോം മൂഡിയും ടിം കര്‍ട്ടിന്‍സും കൂട്ടിച്ചേര്‍ത്ത 309 റണ്‍സിന്റെ റെക്കോര്‍ഡ് കൂട്ടുകെട്ടാണ് ഈ സഖ്യം മറികടന്നത്.