കാഞ്ഞിരപ്പള്ളി: സൈബര്‍ തട്ടിപ്പിനിരയായി കാഞ്ഞിരപ്പള്ളി സ്വദേശിനിയായ വീട്ടമ്മയ്ക്ക് ഒരു കോടി 86 ലക്ഷത്തോളം രൂപ നഷ്ട്ടപ്പെട്ടു. ഈ മാസം ഒന്നാം തീയതിയാണ് വയോധികക്ക് സിബിഐയുടെ ഓഫീസില്‍നിന്നാണെന്നു പറഞ്ഞ് തട്ടിപ്പ് സംഘത്തിന്റെ ഫോണ്‍ വന്നത്. ഇവര്‍ വീട്ടമ്മയുടെ പേരും, കുടുംബവിവരങ്ങളും പറയുകയും തുടര്‍ന്ന് വാട്‌സാപ്പില്‍ വീഡിയോ കോളില്‍ വരാന്‍ ആവശ്യപ്പെടുകയുമായിരുന്നു. കൂടാതെ വീട്ടമ്മയോട് സിബിഐയിലെ ഉദ്യോഗസ്ഥനാണെന്ന് പരിചയപ്പെടുത്തി വീഡിയോ കോളില്‍ ഒരാള്‍ സംസാരിക്കുകയും ചെയ്തു.

തുടര്‍ന്ന് വീട്ടമ്മയുടെ ബാങ്ക് അക്കൗണ്ടിന്റെ വിവരങ്ങള്‍ പറയുകയും, മുംബൈയിലുള്ള ബാങ്കില്‍ വീട്ടമ്മയുടെ അക്കൗണ്ടില്‍ കള്ളപ്പണം വെളുപ്പിക്കല്‍ നടന്നതായി കണ്ടെത്തിയെന്നും, അറസ്റ്റ് വാറണ്ട് ഉണ്ടെന്നും ഉടന്‍തന്നെ അറസ്റ്റ് ചെയ്യുമെന്നും പറഞ്ഞ് ഭീഷണിപ്പെടുത്തുകയും ചെയ്തു. കൂടാതെ വീഡിയോ കോളില്‍ വ്യാജമായി നിര്‍മിച്ച അറസ്റ്റ് വാറണ്ട് കാണിക്കുകയും ചെയ്തു. പരിഭ്രാന്തയായ വീട്ടമ്മയോട് ഇതില്‍നിന്നും ഒഴിവാകണമെങ്കില്‍ പണം തരണമെന്നും, കൂടാതെ ഈ കാര്യങ്ങള്‍ ആരോടെങ്കിലും പറഞ്ഞാല്‍ വിദേശത്തുള്ള മക്കളുടെ ജോലി കളയുമെന്നും ഭീഷണിപ്പെടുത്തുകയും ചെയ്തു.

തുടര്‍ന്ന് പലതവണകളായി 1,86,62,000 രൂപ ഇവര്‍ പറഞ്ഞ അക്കൗണ്ടുകളിലേക്ക് വീട്ടമ്മ അയച്ചുകൊടുത്തു. പണം കൈമാറിയതിനുശേഷം അവരെ ബന്ധപ്പെടാന്‍ കഴിയാതിരുന്നപ്പോള്‍ ഇത് തട്ടിപ്പാണെന്ന് സംശയം തോന്നിയാണ് വീട്ടമ്മ കാഞ്ഞിരപ്പള്ളി പൊലിസ് സ്റ്റേഷനില്‍ പരാതി നല്‍കിയത്. പൊലിസ് വിശദമായ അന്വേഷണം നടത്തിവരികയാണെന്നും, പൊലിസോ, കോടതിയോ, അന്വേഷണ സംഘങ്ങളോ ഏതെങ്കിലും കേസുമായി ബന്ധപ്പെട്ട് അക്കൗണ്ടുകളിലേക്ക് പണം നിക്ഷേപിക്കാന്‍ ആവശ്യപ്പെടില്ലെന്നും, വീഡിയോ കോള്‍ വഴി അറസ്റ്റ് ചെയ്യില്ലെന്നും പൊതുജനങ്ങള്‍ ഇത്തരം തട്ടിപ്പുകളില്‍ കൂടുതല്‍ ജാഗ്രത പുലര്‍ത്തണമെന്നും ജില്ലാ പൊലിസ് മേധാവി ഷാഹുല്‍ഹമീദ് ഐ.പി.എസ് വ്യക്തമാക്കി.

A Kanjirappally resident fell victim to an online scam, losing ₹1.86 crore after being deceived by a fraudster posing as a CBI officer, highlighting the need for caution against cybercrime.