ഗോണ്ഡ (യു.പി): അയോധ്യയില്‍ ശ്രീരാമന്റെ കൂറ്റന്‍ പ്രതിമ നിര്‍മിക്കാന്‍ യോഗി സര്‍ക്കാര്‍ ശ്രമം തുടങ്ങിയതോടെ, പാര്‍ട്ടിയെ പ്രതിസന്ധിയിലാക്കി പാളയത്തില്‍ പട ശക്തമാകുന്നു. അയോധ്യയിലെ തര്‍ക്കഭൂമിയില്‍ ബുദ്ധന്റെ പ്രതിമ സ്ഥാപിക്കണമെന്നാണ് ബറൈച്ചില്‍നിന്നുള്ള ബി.ജെ.പി എം.പി സാവിത്രിഭായ് ഫുലെ ആവശ്യപ്പെട്ടത്.
അലഹബാദ് ഹൈക്കോടതി നിര്‍ദേശ പ്രകാരം തര്‍ക്കഭൂമിയില്‍ നടത്തിയ പരിശോധനയില്‍ ശ്രീബുദ്ധനുമായി ബന്ധപ്പെട്ട വസ്തുക്കള്‍ കണ്ടെത്തിയിട്ടുണ്ട്. അതുകൊണ്ട് അവിടെ ബുദ്ധ പ്രതിമ നിര്‍ബന്ധമായും സ്ഥാപിക്കണമെന്ന് ദലിത് നേതാവുകൂടിയായ സാവിത്രിഭായ് ഫുലെ പറഞ്ഞു. ബുദ്ധന്‍ ഭാരതീയനാണ്. അയോധ്യ ബുദ്ധന്റെകൂടി സ്ഥലമാണ്. ഈ സാഹചര്യത്തില്‍ നിര്‍ബന്ധമായും തര്‍ക്കഭൂമിയില്‍ ബുദ്ധന്റെ പ്രതിമ സ്ഥാപിക്കണം. അയോധ്യയുമായി ബന്ധപ്പെട്ട വിവാദങ്ങളില്‍ മാധ്യമങ്ങളുമായി സംസാരിക്കുമ്പോഴായിരുന്നു അവര്‍ ഇക്കാര്യം ആവശ്യപ്പെട്ടത്.
അയോധ്യയില്‍ രാമക്ഷേത്രം നിര്‍മിക്കണമെന്ന് ആവശ്യപ്പെടുന്ന സ്വകാര്യ ബില്‍ പാര്‍ലമെന്റില്‍ അവതിപ്പിക്കുമെന്നു ബി.ജെ.പി രാജ്യസഭാംഗമായ രാകേഷ് സിന്‍ഹ പറഞ്ഞിരുന്നു.
ഇക്കാര്യം മാധ്യമപ്രവര്‍ത്തകര്‍ ചൂണ്ടിക്കാട്ടിയപ്പോഴാണ് ഇന്ത്യ മതേതര രാജ്യമാണെന്നും ഭരണഘടനയനുസരിച്ച് എല്ലാ മതങ്ങള്‍ക്കും തുല്യമായ സംരക്ഷണം നല്‍കേണ്ടതുണ്ടെന്നും സാവിത്രിഭായ് ആവശ്യപ്പെട്ടത്. ഭരണഘടനയനുസരിച്ചാണ് സര്‍ക്കാരുകള്‍ പ്രവര്‍ത്തിക്കേണ്ടതെന്നും അവര്‍ പറഞ്ഞു.
അയോധ്യയില്‍ രാമക്ഷേത്രം നിര്‍മിക്കണമെന്ന ആവശ്യവുമായി സംഘ്പരിവാര്‍ ഉള്‍പ്പെടെയുള്ള ഹൈന്ദവ ശക്തികള്‍ രംഗത്തുവന്നതിനു പിന്നാലെയാണ് ബി.ജെ.പിയെ വെട്ടിലാക്കി സാവിത്രിഭായ് നിലപാട് വ്യക്തമാക്കിയത്.