ജിദ്ദ: ലോകത്തെ ഏറ്റവും ഉയരംകൂടിയ തൂക്കുപള്ളി ഇനി സഊദിയില്‍. മക്കയിലെ വിശുദ്ധ ഹറമിനു സമീപമായാണ് പള്ളി നിര്‍മിക്കുന്നത്. വിശുദ്ധ കഅ്ബാലയം നേരിട്ടുകാണാന്‍ സാധിക്കും വിധം 161 മീറ്റര്‍ ഉയരത്തില്‍ നിര്‍മിക്കുന്ന മസ്ജിദിന് 400 ചതുരശ്ര മീറ്റര്‍ വിസ്തീര്‍ണമാണുള്ളത്. ഒരേസമയം ഇരുനൂറിലേറെ പേര്‍ക്ക് ഇവിടെ നിസ്‌കാരം നിര്‍വഹിക്കാം. മസ്ജിദിന്റെ നിര്‍മാണം അന്തിമഘട്ടത്തിലെത്തിയതായും ബന്ധപ്പെട്ടവര്‍ അറിയിച്ചു.
വിശുദ്ധ ഹറമിനോട് ചേര്‍ന്നുള്ള ജബല്‍ ഉമര്‍ പദ്ധതിയിലെ ഇരട്ട ടവറുകളെ ബന്ധിപ്പിച്ചാണ് തൂക്കുപള്ളി. രണ്ടു ടവറുകളെയും ബന്ധിപ്പിക്കുന്ന പാലത്തിലാണ് മസ്ജിദ് സജ്ജീകരിക്കുന്നത്. അവസാന മിനുക്കു പണികളും കാര്‍പെറ്റ് വിരിക്കലും അടക്കമുള്ള ജോലികളാണ് ഇനി ശേഷിക്കുന്നത്. നിര്‍മാണം പൂര്‍ത്തിയായ ശേഷം ബന്ധപ്പെട്ട വകുപ്പുകളില്‍നിന്ന് ലൈസന്‍സ് നേടി മസ്ജിദ് വിശ്വാസികള്‍ക്ക് തുറന്നുകൊടുക്കും.
വിശ്വാസികള്‍ക്ക് വിശുദ്ധ കഅ്ബാലയം നേരിട്ട് കാണാന്‍ കഴിയും വിധമാണ് തൂക്കു പള്ളിയുടെ രൂപകല്‍പനയെന്ന് മക്ക ചേംബര്‍ ഓഫ് കൊമേഴ്‌സിലെ റിയല്‍ എസ്റ്റേറ്റ് കമ്മിറ്റി പ്രസിഡന്റ് എന്‍ജിനീയര്‍ അനസ് സ്വാലിഹ് സൈറഫി പറഞ്ഞു.