ചങ്ങനാശ്ശേരി: തെങ്ങണായിലെ രണ്ടു വീടുകളില്‍ മോഷണം. അലമാരയില്‍ സൂക്ഷിച്ചിരുന്ന സ്വര്‍ണവും പണവും മറ്റും മോഷ്ടിച്ചു. തെങ്ങണ പബ്ലിക് ലൈബ്രറിക്കു സമീപം ചെന്തലക്കുന്നേല്‍ അന്‍സാര്‍, ചെന്തലക്കുന്നേല്‍ അബ്ദുല്‍ കരീം എന്നിവരുടെ വീടുകളിലാണ് ചൊവ്വാഴ്ച രാത്രി മോഷണം നടന്നത്. അന്‍സാര്‍ കുടുംബവുമായി വിദേശത്താണ്. മാതാവും സഹോദരനും സമീപത്തുള്ള സഹോദരിയുടെ വീട്ടില്‍ പോയിരുന്നു. ആ സമയം പ്രധാനവാതില്‍ തകര്‍ത്ത് അകത്തു കടന്ന മോഷ്ടാക്കള്‍ മൂന്നുഅടപ്പുള്ള അലമാര തകര്‍ത്ത് അതില്‍ സൂക്ഷിച്ചിരുന്ന അലമാരയില്‍ സ്വര്‍ണാഭരണങ്ങള്‍, എ ടി എം കാര്‍ഡ്, മറ്റു രേഖകള്‍ എന്നിവ അപഹരിക്കുകയായിരുന്നു. എന്നാല്‍ ഇവയുടെ മൂല്യം അന്‍സാര്‍ സ്ഥലത്തെത്തിയശേഷമെ വ്യക്തമാവൂ. വീട്ടുമുറ്റത്ത് പിക്കാസ്, കോടാലി, കമ്പിപ്പാര തുടങ്ങിയവ ഉപേക്ഷിച്ച നിലയില്‍ കണ്ടെത്തി. കൂടാതെ വീടിനുള്ളിലെ മേശപ്പുറത്ത് സമീപവീട്ടിലെ വെട്ടുകത്തിയും
ഉപേക്ഷിച്ചതായി കണ്ടെത്തിയിട്ടുണ്ട്. അബ്ദുല്‍ കരീമിന്റെ വീട്ടിലെ ജനാലയുടെ കമ്പി അറുത്താണ് മോഷ്ടാക്കള്‍ അകത്തു കയറിയതെന്നും കണ്ടെത്തി.