സിംഗപ്പൂര്‍ സിറ്റി: മ്യാന്മറിലെ റോഹിംഗ്യന്‍ മുസ്‌ലിംകള്‍ക്കെതിരായ ആക്രമണത്തില്‍ വിമര്‍ശനവുമായി അമേരിക്ക. സൈന്യത്തിന്റെ പിന്തുണയോടെയുണ്ടായ ആക്രമണത്തെ മാപ്പര്‍ഹിക്കാത്ത പാതകമെന്നാണ് അമേരിക്കന്‍ വൈസ് പ്രസിഡന്റ് മൈക് പെന്‍സ് വിശേഷിപ്പിച്ചത്.
സിംഗപ്പൂരില്‍ സൗത്ത് ഏഷ്യന്‍ രാജ്യങ്ങളുടെ വാര്‍ഷിക ഉച്ചകോടിക്കിടെ മ്യന്മര്‍ ഭരണാധികാരി ആങ് സാന്‍ സൂക്കിയോടു സംസാരിക്കുയായിരുന്നു അദ്ദേഹം. രണ്ടു മാധ്യമപ്രവര്‍ത്തകരെ ജയിലിലടച്ചതു ദശലക്ഷക്കണക്കിന് അമേരിക്കക്കാരെ അസ്വസ്ഥമാക്കുന്നുണ്ടെന്ന് അദ്ദേഹം പറഞ്ഞു. എന്നാല്‍, ഇതുസംബന്ധിച്ചു ജനങ്ങള്‍ക്കു വ്യത്യസ്ത അഭിപ്രമായമാണുള്ളതെന്നു സൂക്കി പറഞ്ഞു.
സൂക്കിക്കെതിരേ മലേഷ്യന്‍ പ്രധാനമന്ത്രി മഹാതീര്‍ മുഹമ്മദ് പ്രതികരിച്ചതിനു പിന്നാലെയാണ് മൈക് പെന്‍സ് രംഗത്തെത്തുന്നത്. സൈന്യത്തിന്റെ നേതൃത്വത്തിലുണ്ടായ ആക്രമണം ന്യായീകരിക്കുന്നതു മാപ്പര്‍ഹിക്കാത്തതാണെന്നു മഹാതീര്‍ മുഹമ്മദ് പറഞ്ഞു. റോഹിംഗ്യകള്‍ക്കെതിരേയുണ്ടായ ആക്രമണം തടയുന്നതില്‍ പരാജയപ്പെട്ടതിനെ തുടര്‍ന്നു സൂക്കിക്കെതിരേ അന്താരാഷ്ട്രതലത്തില്‍ വിമര്‍ശനമുയര്‍ന്നിരുന്നു.
സൂക്കിക്കു നല്‍കിയിരുന്ന പരമോന്നത ബഹുമതി ആംനെസ്റ്റി ഇന്റര്‍നാഷനല്‍ പിന്‍വലിക്കുകയും ചെയ്തിരുന്നു.
അതിനിടെ, ബംഗ്ലാദേശ്-മ്യാന്മര്‍ ധാരണപ്രകാരം റോഹിംഗ്യന്‍ അഭയാര്‍ഥികളെ സ്വദേശത്തേയ്ക്കു മടക്കിയയക്കല്‍ ഈ ആഴ്ച ആരംഭിക്കുകയാണ്. എന്നാല്‍, റാഖൈനിലെ സുരക്ഷയില്‍ പുരോഗതിയില്ലാത്തതിനാല്‍ പുനരധിവാസ പദ്ധതികള്‍ നിര്‍ത്തിവയ്ക്കണമെന്ന് യു.എന്‍ ആവശ്യപ്പെട്ടിട്ടുണ്ട്.