മദീന: മദീനയില്‍ വാഹനങ്ങള്‍ കൂട്ടിയിടിച്ച് തീപിടിത്തമുണ്ടായതിനെ തുടര്‍ന്ന് ഒരു കുടുംബത്തിലെ നാലുപേരടക്കം അഞ്ചുപേര്‍ വെന്തുമരിച്ചു. ഒരു വാഹനത്തിലുണ്ടായിരുന്ന നാലംഗ കുടുംബം ഒന്നടങ്കമാണ് മരിച്ചത്. രണ്ടാമത്തെ വാഹനത്തിലെ ഡ്രൈവറാണ് മരിച്ച മറ്റൊരാള്‍. തേഡ് റിങ് റോഡ് പിന്നിട്ട് തബൂക്കിലേക്കുള്ള അല്‍സലാം റോഡില്‍ വച്ചായിരുന്നു അപകടം. കണ്‍ട്രോള്‍ റൂമില്‍ വിവരം ലഭിച്ചയുടന്‍ രക്ഷാദൗത്യ സംഘങ്ങളും ഒരു വിദഗ്ധ മെഡിക്കല്‍ സംഘവും സംഭവസ്ഥലത്തേക്ക് കുതിച്ചെങ്കിലും ആദ്യ സംഘം സ്ഥലത്ത് എത്തിയപ്പോഴേക്കും അപകടത്തില്‍പെട്ട മുഴുവന്‍ പേരും മരിച്ചിരുന്നുവെന്നു മദീന പ്രവിശ്യാ റെഡ്ക്രസന്റ് അതോറിറ്റി വക്താവ് ഖാലിദ് ബിന്‍ മുസാഇദ് അല്‍സഹ്‌ലി പറഞ്ഞു.