ഷാങ്ഹായ്: ഷാങ്ഹായ് എസ്.ഐ.പി.ജിയുടെ ബ്രസീലിയന്‍ താരം ഓസ്‌ക്കാറിന് എട്ട് മത്സരങ്ങളില്‍ വിലക്ക്. ചൈനീസ് ഫുട്‌ബോള്‍ അസോസിയേഷനാണ് ഓസ്‌ക്കാറടക്കം നാല് താരങ്ങള്‍ക്ക് വിലക്കേര്‍പ്പെടുത്തിയത്. വിലക്കിനൊപ്പം 40,000 യുവാന്‍ പിഴയും താരങ്ങള്‍ നല്‍കണം. ഷാങ്ഹായ്- ഗാങ്ഷു മത്സരത്തിനിടെ എതിര്‍ താരങ്ങളുടെ ശരീരം ലക്ഷ്യമിട്ട് ഓസ്‌ക്കാര്‍ രണ്ട് തവണ പന്ത് മനഃപ്പൂര്‍വം അടിച്ചു. ഇതില്‍ പ്രകോപിതരായി ഗാങ്ഷു താരങ്ങളിലൊരാള്‍ ഓസ്‌ക്കാറിനെ മൈതാനത്ത് തള്ളിയിട്ടു. പിന്നാലെ ഇരു ടീമിന്റേയും താരങ്ങള്‍ കൂട്ടത്തോടെ ഏറ്റുമുട്ടി. പിന്നീട് അധികൃതര്‍ ഇടപെട്ട് രംഗം ശാന്തമാക്കുകയായിരുന്നു.