തൃശൂര്‍: യുവമോര്‍ച്ച നേതാവിന്റെ വീട്ടില്‍ നിന്നും കള്ളനോട്ടും അത് അച്ചടിക്കുന്നതിനുള്ള യന്ത്ര സാമഗ്രികളും പിടികൂടിയതിന്റെ പശ്ചാത്തലത്തില്‍ ബി.ജെ.പി - സംഘപരിവാര്‍ ശക്തികള്‍ നടത്തുന്ന പരിപാടികള്‍ക്ക് വേണ്ടി ചിലവഴിക്കുന്ന പണക്കൊഴുപ്പിന്റെ സ്രോതസ് അന്വേഷിക്കണമെന്ന് ഡി.സി.സി പ്രസിഡന്റ് ടി.എന്‍ പ്രതാപന്‍ ആവശ്യപ്പെട്ടു.     
നോട്ട് പിന്‍വലിക്കുകയും അപ്രഖ്യാപിത സാമ്പത്തിക അടിയന്തിരാവസ്ഥ രാജ്യത്ത് നടപ്പിലാക്കുകയും ചെയ്ത നരേന്ദ്രമോദി സര്‍ക്കാരിന്റെ നയങ്ങള്‍ക്കെതിരെ കോണ്‍ഗ്രസ് ദേശവ്യാപകമായി പ്രക്ഷോഭം നടത്തിയപ്പോള്‍ 'പുരപുറത്ത് കയറിയിരുന്ന്' കള്ളനോട്ടിനും കള്ളപണത്തിനുമെതിരെ പ്രചാരണം നടത്തിയ ബി.ജെ.പിക്കാര്‍ തന്നെ കള്ളനോട്ട് നിര്‍മാണത്തില്‍ ഏര്‍പ്പെട്ടിരിക്കുന്നു എന്നുള്ളത് ചെറുതായി കണ്ടുകൂട. ഉന്നതതല അന്വേഷണം നടത്തിയാല്‍ ഇനിയും കൂടുതല്‍ ഇത്തരത്തിലുള്ള തെളിവുകള്‍ ലഭിച്ചേക്കും. അതുകൊണ്ട് സംസ്ഥാന സര്‍ക്കാര്‍ അടിയന്തിരമായി ഉന്നതതല അന്വേഷണം നടത്താന്‍ തയ്യാറാവണം.