തിരുവനന്തപുരം: അഞ്ച് മണ്ഡലങ്ങളിലേക്ക് നടന്ന ഉപതെരഞ്ഞെടുപ്പില്‍ രണ്ടിടത്ത് വിജയിച്ചതോടെ നിയമസഭയില്‍ ഇടതുമുന്നണിയുടെ അംഗസംഖ്യ 93 ആയി ഉയര്‍ന്നു. പ്രതിപക്ഷത്തിന്റെ അംഗസംഖ്യ 45 ആയി. ഉപതിരഞ്ഞെടുപ്പോടെ സി.പി.എമ്മിനും കോണ്‍ഗ്രസിനും രണ്ട് അംഗങ്ങള്‍ വര്‍ധിച്ചു.
മുസ്‌ലിം ലീഗിനും ഒരംഗം കൂടിയായി. സി.പി.എമ്മിന്റെ ചരിത്രത്തിലെ തന്നെ ഏറ്റവും വലിയ അംഗസംഖ്യയാണ് ഇപ്പോഴുള്ളത്. 2016ലെ നിയമസഭാ തെരഞ്ഞെടുപ്പില്‍ 91 സീറ്റുകളിലാണ് എല്‍.ഡി.എഫ് ജയിച്ചത്. ഇക്കഴിഞ്ഞ ലോക്‌സഭാ തെരഞ്ഞെടുപ്പില്‍ ആലപ്പുഴയില്‍നിന്ന് മത്സരിച്ച് ജയിച്ചതോടെ അരൂര്‍ എം.എല്‍.എയായിരുന്ന എ.എം ആരിഫ് രാജിവച്ചു. ഇതോടെ ഇടതുമുന്നണിയുടെ ആകെ സീറ്റ് 90 ആയി കുറഞ്ഞു. പാലാ ഉപതിരഞ്ഞെടുപ്പില്‍ യു.ഡി.എഫ് സീറ്റ് പിടിച്ചെടുത്തതോടെ എല്‍.ഡി.എഫിന്റെ ആകെ സീറ്റ് 91 ആയി.
കോന്നിയിലെയും വട്ടിയൂര്‍ക്കാവിലെയും ജയത്തോടെ അംഗസംഖ്യ 93 ആയി ഉയര്‍ന്നു. 2016ലെ നിയമസഭാ തെരഞ്ഞെടുപ്പില്‍ 47 സീറ്റുകളിലാണ് യു.ഡി.എഫ് ജയിച്ചത്. മഞ്ചേശ്വരത്തെ ലീഗ് എം.എല്‍.എ പി.ബി അബ്ദുള്‍ റസാഖ് മരണപ്പെട്ടതോടെ സീറ്റ് 46 ആയി കുറഞ്ഞു. ലോക്‌സഭാ തെരഞ്ഞെടുപ്പില്‍ മത്സരിച്ച മൂന്നു കോണ്‍ഗ്രസ് സിറ്റിങ് എം.എല്‍.എമാര്‍ വിജയിച്ചതോടെ അംഗസംഖ്യ 43 ആയി കുറഞ്ഞു. പാലായില്‍ കെ.എം മാണി മരണപ്പെട്ടതോടെ അംഗസംഖ്യ 42 ആയി. ഏറ്റവും ഒടുവില്‍ അഞ്ചുസീറ്റുകളിലേക്കു നടന്ന ഉപതിരഞ്ഞെടുപ്പില്‍ മൂന്ന് സീറ്റില്‍ വിജയിച്ചതോടെ യു.ഡി.എഫിന്റെ അംഗബലം 45 ആയി.