തിരുവനന്തപുരം: തിരുവനന്തപുരം അന്തര്‍ദേശീയ വിമാനത്താവളത്തില്‍ വാഹനങ്ങളുടെ പാര്‍ക്കിങ് അനുവദിച്ചിട്ടില്ലാത്ത സ്ഥലങ്ങളില്‍ പാര്‍ക്കിങ് പാടില്ലെന്ന് വ്യക്തമാക്കുന്ന ബോര്‍ഡുകള്‍ സ്ഥാപിക്കണമെന്ന് സംസ്ഥാന മനുഷ്യാവകാശ കമ്മീഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് ഉത്തരവിട്ടു.
എയര്‍പോര്‍ട്ട് അതോറിറ്റി ഓഫ് ഇന്ത്യ ഇക്കാര്യത്തില്‍ അടിയന്തിര നടപടി സ്വീകരിക്കണമെന്നും കമ്മീഷന്‍ ആവശ്യപ്പെട്ടു. വാഹനാപകടത്തില്‍ പരുക്കേറ്റ് ഗുരുതരാവസ്ഥയിലായ മാതാവിനെ കാണാന്‍ ദുബൈയില്‍ നിന്നും തിരുവനന്തപുരം വിമാനത്താവളത്തിലെത്തിയ പെണ്‍കുട്ടിയെ കൂട്ടിക്കൊണ്ടുപോകാന്‍ വന്ന വട്ടിയൂര്‍ക്കാവ് സ്വദേശി കേണല്‍ കെ. യോഹന്നാന്‍ നല്‍കിയ പരാതിയിലാണ് നടപടി. വിമാനത്താവളത്തില്‍ മറ്റ് കാറുകള്‍ പാര്‍ക്ക് ചെയ്തിരുന്ന സ്ഥലത്ത് യോഹന്നാന്‍ തന്റെ കാറും പാര്‍ക്ക് ചെയ്തു.
പെണ്‍കുട്ടിയുമായി പെട്ടെന്ന് മടങ്ങിയെത്തിയപ്പോള്‍ തന്റെ വാഹനത്തിന്റെ വീല്‍ പൂട്ടിയിരിക്കുന്നത് കണ്ടു. പാര്‍ക്കിങ് പാടില്ലാത്ത സ്ഥലത്ത് പാര്‍ക്ക് ചെയ്തതിന് 3000 രൂപ നല്‍കണമെന്ന് ട്രാഫിക് കോണ്‍സ്റ്റബിള്‍ ആവശ്യപ്പെട്ടു. കൈയില്‍ 3000 രൂപ ഇല്ലാത്തതിനാല്‍ കാറെടുക്കാന്‍ കഴിഞ്ഞില്ല. എ.ടി.എം പ്രവര്‍ത്തനക്ഷമമായിരുന്നില്ല. മറ്റൊരു യാത്രക്കാരന്‍ 3000 രൂപ നല്‍കിയതുകൊണ്ടു മാത്രം കാര്‍ എടുക്കാന്‍ കഴിഞ്ഞതായി പരാതിയിലുണ്ട്. പിഴ പിറ്റേന്ന് അടയ്ക്കാമെന്ന് എയര്‍പോര്‍ട്ട് മാനേജറോട് പറഞ്ഞിട്ടും അനുവദിച്ചില്ലെന്നും പരാതിയില്‍ പറയുന്നു. താന്‍ കാര്‍ പാര്‍ക്ക് ചെയ്തിരുന്ന സ്ഥലത്ത് പാര്‍ക്കിങ് പാടില്ലെന്ന ബോര്‍ഡുണ്ടായിരുന്നില്ല. നിയമപ്രകാരമാണ് പിഴ ഈടാക്കിയതെന്ന് എയര്‍പോര്‍ട്ട് ഡയറക്ടര്‍ കമ്മീഷനെ അറിയിച്ചു. എന്നാല്‍ വിമാനത്താവളത്തില്‍ ആവശ്യാനുസരണം പാര്‍ക്കങ്ങ് സൗകര്യമുണ്ടെന്ന വാദം കമ്മീഷന്‍ അംഗീകരിച്ചില്ല. പാര്‍ക്കിങ് സൗകര്യം ആവശ്യാനുസരണം ഉണ്ടെന്ന് പറയുമ്പോള്‍ മറ്റ് സ്ഥലങ്ങളില്‍ പാര്‍ക്കിങ് പാടില്ലെന്ന് മനസിലാക്കാന്‍ കഴിയില്ലെന്ന് ഉത്തരവില്‍ പറഞ്ഞു. പാര്‍ക്കിങ് അനുവദിച്ചിട്ടില്ലെങ്കില്‍ അക്കാര്യം വ്യക്തമാക്കുന്ന ബോര്‍ഡ് സ്ഥാപിക്കണമെന്നും കമ്മീഷന്‍ ആവശ്യപ്പെട്ടു.