താമരശ്ശേരി: കൂടത്തായി കൊലപാതക പരമ്പര കേസിലെ മുഖ്യപ്രതി ജോളിയെ ഇന്ന് കൊയിലാണ്ടി കോടതിയില്‍ ഹാജരാക്കും. ജോളിയുടെ കസ്റ്റഡി കാലാവധി ഇന്ന് അവസാനിക്കുന്ന സാഹചര്യത്തിലാണ് കോടതിയില്‍ ഹാജരാക്കുന്നത്. ഷാജുവിന്റെ ആദ്യ ഭാര്യ സിലി കൊല്ലപ്പെട്ട കേസിലാണ് ജോളിയെ ഇന്ന് വരെ പൊലിസ് കസ്റ്റഡിയില്‍ വിട്ടത്. താമരശ്ശേരി ജെ.എഫ്.സി.എം കോടതി ഇന്ന് അവധി ആയതിനാലാണ് കൊയിലാണ്ടി മുന്‍സിഫ് കോടതിയില്‍ പ്രതിയെ ഹാജരാക്കുന്നത്.
സിലിയുടെ മകള്‍ ആല്‍ഫൈന്‍ വധക്കേസിലും പൊലിസ് ജോളിയെ അറസ്റ്റ് ചെയ്തു കസ്റ്റഡിയില്‍ വാങ്ങിയേക്കും. ജോളിയുടെ രണ്ടാം ഭര്‍ത്താവ് ഷാജുവിനെതിരേ ശക്തമായ തെളിവുകളാണ് പൊലിസിന് ലഭിച്ചതെന്നറിയുന്നു. ഇയാള്‍ ഉടന്‍ അറസ്റ്റിലാവുമെന്നാണ് സൂചനകള്‍.