പൊന്നാനി: നഗരസഭാ പ്രദേശത്തെ തെരുവ് വിളക്ക് പരിപാലനത്തിന് ഒരു വര്‍ഷത്തെ കരാറെടുത്ത കരാറുകാരന്‍ കൃത്യമായി പ്രവൃത്തി ചെയ്യാതെ മുങ്ങി നടക്കുന്നതിനാല്‍ മാസങ്ങളായി മിക്ക പ്രദേശങ്ങളും ഇരുട്ടിലാണ്.
നിരവധി തവണ കൗണ്‍സില്‍ യോഗത്തില്‍ ഉള്‍പ്പെടെ പരാതിപ്പെട്ടിട്ടും കരാറുകാരനെതിരേ നടപടി എടുക്കാന്‍ ചെയര്‍മാന്‍ മടി കാണിക്കുന്നത് ഒത്തുകളിയുടെ ഭാഗമാണെന്ന് പ്രതിപക്ഷം കുറ്റപ്പെടുത്തി.
മുന്‍ വര്‍ഷങ്ങളില്‍ നിന്നും വ്യത്യസ്തമായി ഉപകരണങ്ങള്‍ കൂടാതെ ഒരു ഇലക്ട്രിക് പോസ്റ്റിന് മുന്നൂറ്റി അന്‍പത്തി അഞ്ച് രൂപ നിരക്കില്‍ കരാര്‍ നല്‍കിയത് തന്നെ വലിയ സാമ്പത്തിക ബാധ്യതയാണ് നഗരസഭക്ക് വരുത്തിവെച്ചിരിക്കുന്നത്.
കരാറുകാരനെതിരേ നടപടി വേണമെന്ന് പ്രതിപക്ഷ നേതാവ് എം.പി നിസാര്‍, കൗണ്‍സിലര്‍ ഉണ്ണികൃഷ്ണന്‍ പൊന്നാനി എന്നിവര്‍ ആവശ്യപ്പെട്ടു. ഈ ആവശ്യം ഉന്നയിച്ച് ശക്തമായ സമരത്തിനും നിയമ നടപടിക്കും പ്രതിപക്ഷം രംഗത്തിറങ്ങുമെന്നും ഇവര്‍ വ്യക്തമാക്കി.