ന്യൂഡല്‍ഹി: ജമ്മുകശ്മീരിലെ കത്‌വയില്‍ എട്ടു വയസുകാരിയെ കൂട്ട ബലാത്സംഗംചെയ്തു കൊലപ്പെടുത്തിയ കേസിലെ മുഖ്യസാക്ഷി താലിബ് ഹുസൈനെ ജമ്മു കശ്മീര്‍ പൊലിസ് കസ്റ്റഡിയില്‍ പീഡിപ്പിച്ചുവെന്നു ചൂണ്ടിക്കാട്ടി നല്‍കിയ ഹരജി സുപ്രിംകോടതി തള്ളി. ജഡ്ജിമാരായ എ.എം ഖാന്‍വില്‍ക്കറും ദീപക് ഗുപ്തയും അടങ്ങുന്ന രണ്ടംഗ സുപ്രിംകോടതി ബെഞ്ചിന്റേതാണ് നടപടി.
നേരിട്ടു കോടതിയില്‍ ഹാജരാകാന്‍ ആവശ്യപ്പെട്ടിട്ടും പരാതിക്കാരന്‍ അനുസരിച്ചില്ലെന്നു കോടതി വിമര്‍ശിച്ചു. ജമ്മുകശ്മീരിലെ കത്‌വയിലെ രസന ഗ്രാമത്തില്‍ തട്ടിക്കൊണ്ടുപോയ എട്ടു വയസുകാരിയെ കൂട്ട ബലാത്സംഗത്തിനിരയാക്കിയ ശേഷം കൊലപ്പെടുത്തിയ കേസിലെ മുഖ്യസാക്ഷിയും പ്രദേശത്തെ പൗരപ്രമുഖനുമായ താലിബ് ഹുസൈന്‍, മറ്റൊരു സ്ത്രീയെ ബലാത്സംഗം ചെയ്ത കേസില്‍ അറസ്റ്റിലായിരുന്നു. ഈ കേസില്‍ കസ്റ്റഡിയില്‍ കഴിയവേ പൊലിസ് അദ്ദേഹത്തെ മര്‍ദിച്ചെന്നു ചൂണ്ടിക്കാട്ടി ബന്ധു നല്‍കിയ ഹരജിയാണ് സുപ്രിംകോടതി തള്ളിയത്.
കേസില്‍ ഈ മാസം 13നു നേരിട്ടു ഹാജരാകണമെന്നു വിചാരണാ കോടതി ആവശ്യപ്പെട്ടിരുന്നുവെങ്കിലും പരാതിക്കാരന്‍ അനുസരിച്ചിരുന്നില്ല. ഈ സാഹചര്യത്തില്‍ ഹരജി തള്ളുകയാണെന്നു രണ്ടംഗ ബെഞ്ച് വ്യക്തമാക്കി.