തൃശൂര്‍: പ്രശസ്ത പത്രപ്രവര്‍ത്തകനും എക്‌സ്പ്രസ് പത്രാധിപരുമായിരുന്ന ടി.വി അച്യുത വാര്യരുടെ സ്മരണാര്‍ഥം തൃശൂര്‍ പ്രസ് ക്ലബ്ബ് ഏര്‍പ്പെടുത്തിയ നാലാമത് അച്യുത വാര്യര്‍ പുരസ്‌കാരത്തിന് മാതൃഭൂമി ന്യൂസ് വയനാട് ബ്യൂറോയിലെ ക്യാമറാമാന്‍ ഷമീര്‍ മച്ചിങ്ങലും ജനയുഗം കൊച്ചി യൂനിറ്റിലെ ഫോട്ടോഗ്രാഫര്‍ വി.എന്‍ കൃഷ്ണപ്രകാശും അര്‍ഹരായി.
10,001 രൂപയും പ്രശസ്തി പത്രവും ഫലകവും അടങ്ങുന്നതാണ് അവാര്‍ഡുകള്‍. 2015-16 വര്‍ഷങ്ങളില്‍ പ്രസിദ്ധീകരിച്ച പരിസ്ഥിതി പ്രമേയമായ ഫോട്ടോകളും ക്യാമറ സ്റ്റോറികളുമാണ് അവാര്‍ഡിന് പരിഗണിച്ചത്. അപൂര്‍വ ഇനത്തില്‍പ്പെട്ട വയനാട്ടിലെ മണവാട്ടി തവളകള്‍ കൊടും ചൂടും പരിസ്ഥിതി പ്രത്യാഘാതങ്ങളും മൂലം വംശനാശം സംഭവിച്ചു കൊണ്ടിരിക്കുന്നതാണ് ഷമീറിന്റെ ക്യാമറ ദൃശ്യവത്കരിച്ചത്. 'ഇവിടെ വാസം സാധ്യമോ' എന്ന അടിക്കുറിപ്പോടെ എറണാകുളം വല്ലാര്‍പ്പാടത്തു നിന്നും പകര്‍ത്തിയതാണ് അവാര്‍ഡിന് അര്‍ഹമായ കൃഷ്ണപ്രകാശിന്റെ ചിത്രം. കെ. രാജഗോപാല്‍, സി.എ കൃഷ്ണന്‍, ജോസഫ് ലാസര്‍ എന്നിവരാണ് അവാര്‍ഡ് നിര്‍ണയിച്ചത്.