വിക്ടോറിയ സിറ്റി: ഹോങ്കോങ്ങില്‍ 2014ലുണ്ടായ കുട വിപ്ലവവുമായി ബന്ധപ്പെട്ടു തങ്ങള്‍ കുറ്റം ചെയ്തിട്ടില്ലെന്നു ജനാധിപത്യ നേതാക്കള്‍ കോടതിയില്‍. പൊതു ഉപദ്രവുമുണ്ടാക്കിയെന്ന കേസ് നേരിടുന്ന മൂന്നു നേതാക്കളാണ് ഇന്നലെ ഹോങ്കോങ്ങിലെ വെസ്റ്റ് കോലൂന്‍ മജിസ്‌ട്രേറ്റില്‍ തങ്ങളുടെ വാദം അവതരിപ്പിച്ചത്.
ചൈനയില്‍നിന്നുള്ള സ്വതന്ത്ര്യ ജുഡിഷ്യല്‍ സംഘമാണ് വിചാരണയ്ക്കു നേതൃത്വം നല്‍കുന്നത്. കോളനി കാലത്തുണ്ടായ നിയമത്തിനു കീഴില്‍ ഒന്‍പതു പേര്‍ക്കെതിരേയാണ് വിചാരണ നടക്കുന്നത്. കുറ്റവാളികളാണെന്നു കണ്ടെത്തുകയാണെങ്കില്‍ ഏഴു വര്‍ഷത്തില്‍ കൂടുതല്‍ തടവാണ് ഇവര്‍ക്കു ലഭിക്കുക.
വിചാരണ 20 ദിവസം നീണ്ടേക്കും. ജനാധിപത്യവാദികളായ നേതാക്കളെ വിചാരണ ചെയ്യുന്നതിനെതിരേ ആംനെസ്റ്റി ഇന്റര്‍നാഷനല്‍ ഉള്‍പ്പെടെയുള്ള സന്നദ്ധ സംഘടനകള്‍ രംഗത്തെത്തിയരുന്നു.
ചൈനീസ് ഇടപെടലിനെതിരേ സ്വതന്ത്ര തെരഞ്ഞെുപ്പ് ആവശ്യപ്പെട്ട് 2014 സെപ്റ്റംബര്‍ 28നായിരുന്ന കുട വിപ്ലവം തുടങ്ങിയത്. നഗരങ്ങള്‍ കൈയടക്കി 79 ദിവസം നീണ്ട പ്രതിഷേധത്തില്‍ ഹോങ്കോങ് പൊലിസിനോടുള്ള നിസഹകരണമായിരുന്നു സമരരീതി. സോഷ്യോളജി അധ്യാപകന്‍ ചാന്‍ കിന്‍ മാന്‍ (59), നിയമ അധ്യാപകന്‍ ബെന്നി തായ്(54), ബാപ്റ്റിസ്റ്റ് മന്ത്രി ചു യു മിങ് (74) എന്നവരായിരുന്നു സമരത്തിന്റെ മുഖ്യനേതൃത്വം.
പ്രതിഷേധത്തിന്റെ ഫലമായ ജനപ്രതിനിധികളെ നേരിട്ടു തെരഞ്ഞെടുക്കുന്നതിനുള്ള അധികാരം 2017ല്‍ ചൈന അനുവദിച്ചു. എന്നാല്‍ ചൈന അനുവദിക്കുന്ന സ്ഥാനാര്‍ഥികളെ മാത്രം തെരഞ്ഞെടുക്കാനുള്ള അധികാരമായിരുന്നു നല്‍കിയിരുന്നത്.