ബഗ്ദാദ്: ബഗ്ദാദില്‍ പെരുന്നാള്‍ വിപണി ലക്ഷ്യം വച്ച് നടന്ന ചാവേര്‍ സ്‌ഫോടനത്തില്‍ മൂന്നു പേര്‍ കൊല്ലപ്പെട്ടു. കിഴക്കന്‍ മൗസിലിലാണ് സ്‌ഫോടനം. എട്ടുപേര്‍ മരിച്ചതായാണ് അനൗദ്യോഗിക റിപോര്‍ട്ട്. മുതന്ന പ്രദേശത്താണ് സ്‌ഫോടനമുണ്ടായത്. മൗസിലിന്റെ പ്രാന്തപ്രദേശമാണിത്. തിരക്കേറിയ പെരുന്നാള്‍ വിപണിയിലായിരുന്നു ആക്രമണം. ഒരു പൊലിസുകാരന്‍ തടഞ്ഞു നിര്‍ത്തിയതിനെ തുടര്‍ന്നാണ് ആദ്യ ചാവേര്‍ പൊട്ടിത്തെറിച്ചത്. ഷോപ്പിങ് സെന്ററിനുള്ളില്‍ പ്രവേശിച്ച രണ്ടാമത്തെ ചാവേര്‍ പൊട്ടിത്തെറിച്ചു. ഇവിടെയുണ്ടായിരുന്നവരാണ് മരിച്ചത്. രണ്ടു പേര്‍ മരിച്ചെന്നും ഒന്‍പതു പേര്‍ക്ക് പരുക്കേറ്റെന്നുമാണ് അല്‍ ഖന്‍സാ ആശുപത്രി അധികൃതര്‍ പറയുന്നത്. മൂന്നാമത്തെ ചാവേറിനെ പൊലിസ് വെടിവച്ചു കൊന്നു. മൗസിലിന്റെ കിഴക്കന്‍ മേഖല കഴിഞ്ഞ ജനുവരിയില്‍ ഐ.എസില്‍ നിന്ന് സൈന്യം മോചിപ്പിച്ചിരുന്നു.