ആലപ്പുഴ: ജില്ലയില്‍ നബിദിന റാലിക്ക് വിപുലമായ ഒരുക്കങ്ങള്‍. ലജനത്തുല്‍ മുഹമ്മദീയയുടെ നേതൃത്വത്തില്‍ നടക്കുന്ന റാലിക്ക് പ്രസിഡന്റ് എ.എം നസീര്‍ നേതൃത്വം നല്‍കും. മസ്താന്‍ പള്ളിയില്‍നിന്നും വൈകിട്ട് നാലോടെ ആരംഭിക്കുന്ന റാലി ലജനത്തുല്‍ മുഹമ്മദീയ അങ്കണത്തില്‍ സമാപിക്കും.
പൊതുസമ്മേളനം സംസ്ഥാന വഖ്ഫ് ബോര്‍ഡ് ചെയര്‍മാന്‍ പാണാക്കാട് സയ്യിദ് റഷീദലി ഷിഹാബ് തങ്ങള്‍ ഉദ്ഘാടനം ചെയ്യും. പൊന്നാട് മുസ്‌ലിം ജമാഅത്ത് കമ്മിറ്റിയുടെ നേതൃത്വത്തിലുള്ള നബിദിനാഘോഷ പരിപാടികള്‍ രാവിലെ എട്ടിന് മഹല്ല് പ്രസിഡന്റ് എ. മുഹമ്മദുകുഞ്ഞ് പതാക ഉയര്‍ത്തുന്നതോടെ തുടക്കമാകും.
വൈകിട്ട് 6,30 ന് നടക്കുന്ന സമ്മേളനം മഹല്ല് ഖത്തീബ് മുഹമ്മദ് ഹനീഫാ ബാഖവി ഉദ്ഘാടനം ചെയ്യും. സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗം ഐ. ബി ഉസ്മാന്‍ ഫൈസി വിശിഷ്ടാതിഥിയാകും. സബ് കലക്ടര്‍ കൃഷ്ണതേജ അവാര്‍ഡുകള്‍ വിതരണം ചെയ്യും. തോട്ടപ്പള്ളി മുസ്‌ലിം ജമാഅത്ത് കമ്മിറ്റിയുടെ ആഭിമുഖ്യത്തില്‍ ഇന്ന് രാവിലെ എട്ടിന് മുനവ്വിറുല്‍ ഹുദ മദ്‌റസ, മദ്രസത്തുല്‍ ഇസ്‌ലാമിയ വിദ്യാര്‍ഥികളും രക്ഷകര്‍ത്താക്കളും കമ്മിറ്റി അംഗങ്ങളും അണിനിരക്കുന്ന 'നബിദിന സന്ദേശറാലി' സംഘടിപ്പിക്കും. പാട്ടുകുളങ്ങര റഹ്മത്തുല്‍ ഇസ്‌ലാം മദ്‌റസയുടെ ആഭിമുഖ്യത്തില്‍ നബിദിനാഘോഷം വൈകുന്നേരം ആറിന് എ.എം ആരിഫ് എം.എല്‍.എ അധ്യക്ഷനാവും. കെ.സി വേണുഗോപാല്‍ എം.പി ഉദ്ഘാടനം ചെയ്യും.
ചാരുംമൂട്: നബിദിന റാലികള്‍ ചാരുംമൂട് മേഖലയിലെ മുസ്‌ലിം ജമാ-അത്തുകളില്‍ ഇന്ന് നടക്കും. ആദിക്കാട്ടുകുളങ്ങര മുസ്‌ലിം ജമാഅത്ത് കമ്മിറ്റിയുടെ നേതൃത്വത്തില്‍ നബിദിനാഘോഷവും മത സൗഹാര്‍ദ്ദ സമ്മേളനവും ഇന്ന് വൈകിട്ട് 5ന് നടക്കും. രാവിലെ ആറ് മുപ്പതിന് മൗലൂദ് പാരായണം എട്ടുമണിക്ക് നബിദിനാഘോഷ റാലി മതവിദ്യാര്‍ഥികളും രക്ഷകര്‍ത്താക്കളും പങ്കെടുക്കും. എരുമക്കുഴി ഹയാത്തുല്‍ ദീന്‍ മദ്‌റസയില്‍ നിന്ന് ആരംഭിച്ച് മേട്ടുംപുറം ജങ്ഷനിലെത്തി തിരിച്ച് ജമാഅത്ത് അങ്കണത്തില്‍ എത്തിച്ചേരും.
പതിനൊന്ന് മുതല്‍ നേര്‍ച്ച വിതരണം വൈകിട്ട് അഞ്ചിന് ജമാഅത്ത് കമ്മിറ്റിയുടെ നേതൃത്വത്തില്‍ ജമാഅത്ത് കമ്മിറ്റി അംഗങ്ങളും മുഅല്ലിങ്ങളും പങ്കെടുക്കുന്ന നബിദിന റാലി തുടര്‍ന്ന് മതസൗഹാര്‍ദ സമ്മേളനം കൊടിക്കുന്നില്‍ സുരേഷ് എം.പി ഉദ്ഘാടനം ചെയ്യും. ജമാഅത്ത് പ്രസിഡന്റ് അല്‍ഹാജ് ഇബ്രാഹീം റാവുത്തര്‍ അധ്യക്ഷനാവും.
ആര്‍. രാജേഷ് എം.എല്‍.എ മുഖ്യ പ്രഭാഷണം നടത്തും. ചുനക്കര വടക്ക് നൂറുല്‍ ഇസ്‌ലാം ജമാഅത്തിന്റെ നേതൃത്വത്തില്‍ രാവിലെ എട്ടിന് മദ്‌റസ വിദ്യാര്‍ഥികളുടെയും ജമാഅത്ത് അംഗങ്ങളുടെയും നബിദിന റാലി പള്ളി അങ്കണത്തില്‍ നിന്നും ആരംഭിച്ച് ചാരുംമൂട് ജങ്ഷനിലെത്തി തിരിച്ചു പള്ളിയങ്കണത്തില്‍ എത്തിച്ചേരും. തുടര്‍ന്ന് അന്നദാനം വൈകിട്ട് അഞ്ചിന് പൊതുസമ്മേളനം. ജമാഅത്ത് പ്രസിഡന്റ് ബിനു ഉസ്മാന്‍ അധ്യക്ഷനാവും.
ഇമാം മൂസ മൗലവി മുഖ്യപ്രഭാഷണം നടത്തും. മദ്‌റസ കലാ മത്സരത്തില്‍ വിജയികളായവര്‍ക്കുള്ള സമ്മാനവിതരണവും സമ്മേളനത്തില്‍ നടത്തും ചുനക്കര തെക്ക് മുസ്‌ലിം ജമാഅത്ത് നേതൃത്വത്തില്‍ രാവിലെ എട്ടിന് നബിദിന റാലി ആരംഭിക്കും. തെരുവില്‍ മുക്ക് ചാരുംമൂട് പറയം കുളം എന്നിവിടങ്ങളില്‍ സഞ്ചരിച്ച് ജമാഅത്ത് അങ്കണത്തില്‍ എത്തിച്ചേരും .തുടര്‍ന്ന് അന്നദാനം നടക്കും വെട്ടിയാര്‍ കിഴക്കേ മുസ്‌ലിം ജമാഅത്ത് നേതൃത്വത്തില്‍ രാവിലെ എട്ടിന് മദ്‌റസ വിദ്യാര്‍ഥികളുടെ നബിദിന റാലി നടക്കും വെട്ടിയാര്‍ ഹിദായത്തുല്‍ ഇസ്‌ലാം ജമാഅത്ത് കമ്മിറ്റി ഇത്തവണ പ്രളയ ദുരന്തത്തില്‍ എല്ലാം നഷ്ടപ്പെട്ടവര്‍ക്ക് ഐക്യദാര്‍ഢ്യം പ്രഖ്യാപിച്ച് നബിദിന റാലി മാറ്റിവെച്ചു നബിദിന ആഘോഷം ലഘൂകരിക്കുവാനും തീരുമാനിച്ചു.
എരമല്ലൂര്‍: പട്ടണക്കാട് മുസ്‌ലീം ജമാഅത്ത് മഹല്‍ കമ്മിറ്റിയുടെ ആഭിമുഖ്യത്തില്‍ നബിദിനാഘോഷം ഇന്ന് നടക്കും. രാവിലെ മൗലൂദ് പാരായണം, വൈകിട്ട് 4-ന് നടക്കുന്ന നബിദിന റാലി പൊന്നാംവെളി ജങ്ഷനില്‍ നിന്നും ആരംഭിക്കും. പാണാവളളി മണപ്പുറം മുസ്‌ലീം മഹല്‍ ജമാഅത്ത് കമ്മിറ്റിയുടെ ആഭിമുഖ്യത്തില്‍ രാവിലെ 8 മണിക്ക് നബിദിന റാലി, വൈകിട്ട് 4-ന് നബിദിന സമ്മേളനവും നടക്കും.