പാനൂര്‍: പാനൂരിനടുത്ത് മൊകേരി തങ്ങള്‍പീടികയില്‍ സംസ്ഥാനപാതയില്‍ സ്വകാര്യ ബസും കാറും കൂട്ടിയിടിച്ച് നിരവധി പേര്‍ക്ക് പരുക്കേറ്റു. കാര്‍ യാത്രികനായ പാനൂര്‍പീടികയിലെ യൂസഫ് ഹാജി മകന്‍ സഫ്‌നാസി(4)നെ കോഴിക്കോട് സ്വകാര്യ ആശുപത്രിയില്‍ പ്രവേശിപ്പിച്ചു. ഡ്രൈവര്‍ സഫീര്‍, ഇരുചക്ര വാഹന യാത്രക്കാരന്‍ നിള്ളങ്ങലിലെ ഉണ്ണികൃഷ്ണന്‍(50) എന്നിവരെ തലശ്ശേരി സ്വകാര്യ ആശുപത്രിയിലും പ്രവേശിപ്പിച്ചു. ഇന്നലെ വൈകുന്നരം 3.30ഓടെയായിരുന്നു അപകടം. പാനൂരില്‍ നിന്നു കൂരാറ പൊന്ന്യം പാലം വഴി തലശ്ശേരിക്ക് പോവുകയായിരുന്ന അലോണ ബസും കാറുമാണ് കൂട്ടിയിടിച്ചത്. കാറിന് പിന്നാലെ വന്ന രണ്ട് ഇരുചക്ര വാഹന യാത്രികര്‍ക്കും അപകടത്തില്‍ പരുക്കേറ്റു.
നാട്ടുകാരും പാനൂര്‍ പൊലിസും ഫയര്‍ഫോഴ്‌സും ചേര്‍ന്നാണ് പരുക്കേറ്റവരെ തലശേരിയിലെ വിവിധ ആശുപത്രികളിലെത്തിച്ചത്. വാഹനങ്ങളുടെ അമിതവേഗതയാണ് അപകട കാരണം. അപകടത്തെ തുടര്‍ന്ന് പാനൂര്‍ -കൂത്തുപറമ്പ് റൂട്ടില്‍ മണിക്കൂറുകളോളം ഗതാഗതം സ്തംഭിച്ചു.