തൃശൂര്‍: സംസ്ഥാന സ്‌കൂള്‍ ഗെയിംസിലെ ജൂഡോ മത്സരങ്ങള്‍ ഇന്ന് തുടങ്ങും.
വി.കെ.എന്‍ മേനോന്‍ ഇന്‍ഡോര്‍ സ്റ്റേഡിയം, അക്വാട്ടിക് കോംപ്ലക്‌സ്, ഗവ. എന്‍ജി.കോളജ് മൈതാനം എന്നിവിടങ്ങളില്‍ നവംബര്‍ രണ്ടുവരെയാണ് മത്സരങ്ങള്‍. 14 ജില്ലകളില്‍നിന്ന് 3500 ലേറെ കായികതാരങ്ങളും 300ല്‍പ്പരം ഒഫിഷ്യല്‍സും പങ്കെടുക്കുന്നുണ്ട്.
മത്സര വിജയികള്‍ക്ക് സ്‌കൂള്‍ ഗെയിംസ് ഫെഡറേഷന്‍ ഓഫ് ഇന്ത്യയുടെ ദേശീയചാംപ്യന്‍ഷിപ്പുകളില്‍ പങ്കെടുക്കുവാന്‍ അവസരം ലഭിക്കും. നീന്തല്‍ മത്സരത്തില്‍ ഫ്രീ സ്‌റ്റൈല്‍ 400 മീറ്ററില്‍ സബ്ജൂനിയര്‍ ബോയ്‌സ് വിഭാഗത്തില്‍ ഗൗരിശങ്കര്‍ (എച്ച്.എസ്.എസ് നന്ദിയോട്), ജി. അഭിജിത്ത് (ബി.എന്‍.വി.വി തിരുവല്ലം), സബ് ജൂനിയര്‍ ഗേള്‍സ് വിഭാഗത്തില്‍ എസ്. വര്‍ഷ (സി.എസ്.എച്ച് പിരപ്പന്‍കോട്), എം.ആര്‍ അനഘ (സായ്,തിരുവനന്തപുരം)ജേതാക്കളായി. ജൂനിയര്‍ ബോയ്‌സ് വിഭാഗത്തില്‍ ജി.ആര്‍ കുമരേഷ് (സായ്, തിരുവനന്തപുരം), ടി.എസ് പ്രണവ് (വി.എച്ച്.എസ്.എസ് കളമശേരി)എന്നിവരും, ജൂനിയര്‍ ഗേള്‍സ് വിഭാഗത്തില്‍ ഭദ്ര സുദേവന്‍ (സായ്, തിരുവനന്തപുരം), അമൃത എലിന്‍ ബേബി (ചെര്‍പുങ്കല്‍ ഹോളിക്രോസ് എച്ച്.എസ്.എസ്)എന്നിവരും, സീനിയര്‍ ബോയ്‌സ് വിഭാഗത്തില്‍ എസ്. ആകാശ് (തിരുവല്ലം എച്ച്.എസ്.എസ്),യു. ഉല്ലാസ് (സായ് തിരുവനന്തപുരം) എന്നിവരും, സീനിയര്‍ ഗേള്‍സ് വിഭാഗത്തില്‍ അനീന ബിജു (സായ് തിരുവനന്തപുരം), അനുമോള്‍ (സി.എസ്.എച്ച് പിരപ്പന്‍കോട്) എന്നിവരും ജേതാക്കളായി.