ന്യൂഡല്‍ഹി: ലോക്‌സഭാ, നിയമസഭാ തെരഞ്ഞെടുപ്പുകളില്‍ ഇലക്ട്രോണിക് വോട്ടിങ് യന്ത്രങ്ങള്‍ (ഇ.വി.എം) പൂര്‍ണമായി ഒഴിവാക്കി ബാലറ്റ് പേപ്പറുകള്‍ ഉപയോഗിക്കണമെന്നാവശ്യപ്പെടുന്ന പൊതുതാല്‍പര്യ ഹരജി സുപ്രിംകോടതി തള്ളി.
ലോക്‌സഭാ, നിയമസഭാ തെരഞ്ഞെടുപ്പുകളില്‍ വിശ്വാസ്യത നഷ്ടപ്പെട്ട വോട്ടിങ് യന്ത്രങ്ങള്‍ക്കു പകരം ബാലറ്റ് പേപ്പര്‍ ഉപയോഗിച്ചു വോട്ടെടുപ്പ് നടത്തണമെന്നും ഇതിനായി കേന്ദ്ര തെരഞ്ഞെടുപ്പ് കമ്മിഷനു നിര്‍ദേശം നല്‍കണമെന്നുമാവശ്യപ്പെട്ടു ന്യായ് ഭൂമി എന്ന സന്നദ്ധ സംഘടന നല്‍കിയ ഹരജിയാണ് ചീഫ് ജസ്റ്റിസ് രഞ്ജന്‍ ഗൊഗോയി അധ്യക്ഷനായ മൂന്നംഗ ബെഞ്ച് തള്ളിയത്. വോട്ടിങ് യന്ത്രങ്ങള്‍ ദുരുപയോഗം ചെയ്യപ്പെടാന്‍ സാധ്യത കൂടുതലാണ്.
അതിനാല്‍, സ്വതന്ത്രവും നീതിയുക്തവുമായ തെരഞ്ഞെടുപ്പ് നടത്താന്‍ ബാലറ്റ് പേപ്പര്‍ ഉപയോഗിക്കണമെന്നായിരുന്നു ഹരജിയിലെ ആവശ്യം.
ഏതു സംവിധാനവും യന്ത്രങ്ങളും ഉപയോഗിക്കാനും ദുരുപയോഗം ചെയ്യാനും കഴിയുമെന്നും എല്ലായിടത്തും സംശയങ്ങളുണ്ടാകുമെന്നും വ്യക്തമാക്കിയാണ് ഹരജി കോടതി തള്ളിയത്.